اسلام آباد: وزیراعظم عمران خان کی زیر صدارت اجلاس میں سابق وزیراعظم نواز شریف کی میڈیکل رپورٹ پیش کر دی گئی۔
تفصیلات کے مطابق وفاقی دارالحکومت اسلام آباد میں وزیراعظم عمران خان کی زیرصدارت پارٹی رہنماؤں کا اجلاس ہوا جس میں سندھ میں نئے آئی جی کی تعیناتی کا تذکرہ کیا گیا۔
وزیراعظم عمران خان نے کہا کہ سندھ میں جھوٹے کیسزکی رپورٹس موصول ہوئی تھیں،فیصلہ کیا ایسا آئی جی لائیں گے جو سیاسی مقاصد کے لیے استعمال نہ ہو۔
اجلاس میں سابق وزیراعظم نوازشریف کی میڈیکل رپورٹ پیش کردی گئی، شہزاد اکبر نے 2 صفحات پر مشتمل رپورٹ پربریفنگ دیتے ہوئے کہا کہ رپورٹ جائزے کے لیے پنجاب حکومت کو بھجوائی جا رہی ہے۔
وزیراعظم عمران خان نے رپورٹ کا جائزہ لے کر آئندہ کا لائحہ عمل طے کرنے کی ہدایت کی۔ وزیراعظم نے مہنگائی کم کرنے کے لیے کیے گئے اقدامات کا بھی جائزہ لیا۔
ذرائع کے مطابق اجلاس میں اتحادیوں سے روابط مزید مؤثر کرنے پر اتفاق کیا گیا، وزیراعظم نے اتحادیوں کے لیے کمیٹیوں کو فعال رابطوں کی ہدایت کر دی۔