اسلام آباد : وزیر اعظم عمران خان نے وفاقی کابینہ کا اجلاس کل طلب کرلیا، جس میں امریکہ ایران کشیدگی اور عالمی حالات کا جائزہ لیا جائے گا اور پاک سعودیہ ائیر سروسز کے معاہدہ کی منظوری دی جائے گی۔
تفصیلات کے مطابق وزیر اعظم عمران خان کی زیر صدارت وفاقی کابینہ کا اجلاس کل ہوگا، اجلاس میں امریکہ ایران کشیدگی اور عالمی حالات کا جائزہ لیا جائے گا جبکہ ملک کی سیاسی و معاشی صورتحال پر بھی غور کیا جائے گا۔
اجلاس میں وفاقی کابینہ کے فیصلوں پر عملدرآمد کا جائزہ لیاجائے گااور وزارتوں اور متعلقہ محکموں کی کارکردگی پر بریفنگ دی جائے گی جبکہ کابیینہ قتصادی رابطہ کمیٹی کے فیصلوں اور قانون سازی سے متعلق کمیٹی کے فیصلوں کی توثیق کرے گی۔
کابینہ کا 16 نکاتی ایجنڈہ جاری کردیا گیا ہے، پاک سعودیہ ائیر سروسز کے معاہدہ کی منظوری ، فلیگ آفیسر کی ڈیپوٹیشن پر پاکستان میری ٹائم سیکورٹی ایجنسی کے ڈی جی کے طور پر تقرری کی منظوری ایجنڈے میں شامل ہے۔
ہیوی انڈسٹریز ٹیکسلا بورڈ میں پروڈکشن کنٹرول کے ممبر کی تقرری، پاکستان محتسب کراچی سیکرٹریٹ میں انچارج ممبر کی تقرری بھی ایجنڈے کا حصہ ہیں جبکہ فاٹا اور گلگت بلتستان کے چار فیصد کوٹہ کی تقسیم پر رپورٹ کابینہ کو پیش کی جائےگی۔
کابینہ پی ایس او کے ایم ڈی اور سی ای او کی تقرری کی منظوری دے گی اور کراچی ، پشاور، لاہور اور ملتان میں کثیر المنزلہ عمارتوں کی پالیسی تیار کرے گی جبکہ پاکستان ٹریڈ کنٹرول آف وائلڈ فونا اور فلورا ایکٹ 2012 پر کابینہ میں بریفنگ ہوگی۔
کابینہ اجلاس میں بینکنگ کورٹ لاہور کے جج کی تقرری کی منظوری اور وزارت صحت میں اصلاحات پر کابینہ کو بریفنگ دی جائے گی جبکہ ہومیوپیتھک کالجز کے خلاف شکایات کا معاملہ بھی کابینہ اجلاس میں زیر غور آئے گا، ہومیوپیتھک کالجز کے خلاف شکایات سٹیزن پورٹل پر درج کی گئی تھیں۔