وزیراعظم شہباز شریف سے بین الاقوامی ای کامرس کمپنی علی بابا گروپ کے 6 رکنی وفد کی ملاقات ہوئی ہے۔
وزیراعظم شہباز شریف سے ملاقات میں علی بابا گروپ کے وفد کی قیادت انٹرنیشنل مارکیٹس کے صدر جیمز ڈونگ نے کی، اس موقع پر وفاقی وزیر آئی ٹی شزا فاطمہ، چیئرمین ایف بی آر و متعلقہ اعلیٰ افسران بھی موجود تھے۔
شہباز شریف نے ای کامرس کو مزید فروغ دینے کا لائحہ عمل تیار کرنے کے لیے کمیٹی بنانے کی ہدایت کی۔
انہوں نے کہا کہ علی بابا گروپ جیسے پلیٹ فارمز پر اس وقت تین لاکھ سے زائد پاکستانی مصنوعات فروخت کررہے ہیں، ای کامرس پلیٹ فارمز پر مصنوعات فروخت کرنے والے پاکستانیوں کے لیے اقدامات کیے جائیں۔
وزیراعظم نے کہا کہ جدید دور میں ای کامرس برآمدات میں خاطر خواہ اضافے کا بہت بڑا ذریعہ ہے، ای کامرس حکومت کے برآمدات پر مبنی معیشت کے ویژن کی تکمیل کے لیے انتہائی اہم ہے۔
جیمز ڈونگ نے ای کامرس کے ذریعے تجارت میں پاکستانی کاروباری برادری کے کلیدی کردار کو سراہا اور کہا کہ علی بابا پر تین لاکھ سے زائد پاکستانی مقامی طور پر تیار کردہ مصنوعات فروخت کررہے ہیں۔
ان کا کہنا تھا کہ علی بابا کے پلیٹ فارم پر پاکستانی ٹیکسٹائل مصنوعات کی مانگ، فروخت زیادہ ہے، پاکستان میں ای کامرس کو مزید وسعت دینے کی لامحدود استعداد موجود ہے۔