عدلیہ آئین کی تشریح کرسکتی ہے، دوبارہ لکھ نہیں سکتی، وزیراعظم

وزیراعظم شہباز شریف نے کہا ہے کہ آئین پاکستان نے پارلیمان کی گود سے جنم لیا ہے عدلیہ آئین کی تشریح تو کرسکتی ہے لیکن اسے دوبارہ لکھ نہیں سکتی۔

اے آر وائی نیوز کے مطابق وزیراعظم شہباز شریف نے پاکستان ٹیلیویژن سینٹر کے اسلام آباد سینٹر کی عمارت میں آئین پاکستان ڈیجیٹل ایپ کا افتتاح کیا۔ اس موقع پر منعقدہ تقریب سے خطاب کرتے ہوئے کہا کہ خوشی ہے آئین پاکستان کو ڈیجیٹل ٹیکنالوجی میں تبدیل کر دیا گیا۔ موبائل ایپ کے ذریعے اب تمام پاکستانی آئین سے استفادہ کرسکیں گے۔

وزیراعظم نے کہا کہ آئین پاکستان نے پارلیمان کی گود سے جنم لیا۔ذوالفقاربھٹو، مفتی محمود، شاہ احمد نورانی، عبدالولی خان ودیگر نے آئین تخلیق کیا۔ اس آئین کی پاسداری اور احترام کے لیے تمام اداروں اور قوم کو یکسو ہونا پڑے گا۔

شہباز شریف نے کہا کہ آئین میں ترمیم کا اختیار صرف پارلیمان کو ہے۔ عدلیہ آئین کی تشریح تو کرسکتی ہے لیکن اسے دوبارہ لکھ نہیں سکتی۔ پارلیمان کوئی قانون بنائے جو نافذ بھی نہیں ہوا اس پر عدالت نے اسٹے آرڈر جاری کر دیا۔ ماضی اس طرح عدالت کی طرف سے اسٹے آرڈر کی کوئی مثال نہیں ملتی۔ آئین کو آمروں نے توڑا، عدلیہ سے توقع ہے کہ وہ آئین اور قانون کے محافظ بنے گی۔

ان کا کہنا تھا کہ آج پاکستان ایک دوراہے پر کھڑا ہے۔ مجھ سمیت سیاستدانوں سے بے شمار غلطیاں ہوئیں۔ بڑے لوگ وہی ہوتے ہیں جو غلطیوں سے سبق سیکھ کر آگے چلتے ہیں۔ ہم نے یقیناً سبق سیکھا ہے اور مل کر پاکستان کو مشکل ترین سے حالات سے نکالیں گے۔

وزیراعظم کا کہنا تھا کہ ہمیں مشکل حالات میں یہ اقتدار ملا لیکن ہم یکسو ہیں اور انشااللہ سیاسی اثاثہ ریاست کیلیے قربان کرنے میں نہیں ہچکچائیں گے۔

شہباز شریف نے کہا کہ یہ بہترین فیصلہ ہے کہ تعلیمی اداروں میں آئین نصاب کا حصہ بن جائے۔ آئین اور قانون جب بچے بچے کو حفظ ہوجائیگا تو قانون کی حکمرانی میں مدد ملے گی۔ آئین پاکستان کی 50 ویں سالگرہ پر یہ اقدامات لائق تحسین ہیں۔ اب یہ آئینی مباحثے تعلیمی اداروں میں بھی ہونگے۔ امید کرتا ہوں کہ ہماری نوجوان نسل اس کتاب کو اچھی طرح پڑھے گی۔

اس سے قبل وزیر اطلاعات مریم اورنگزیب نے تقریب سے خطاب کرتے ہوئے کہا کہ آئین پاکستان موبائل ایپ کی تیاری میں نادرا نے بھی تعاون کیا۔ یہ ایپ اردو اور انگلش دونوں زبانوں میں ہے جو پلے اسٹور اور ایپل اسٹور پر دستیاب ہوگی۔