اسلام آباد: وزیراعظم شہباز شریف کا کہنا ہے کہ ہم بہت مشکل حالات سے گزر کر آئے ہیں اور گزر رہے ہیں نفرت اور انتشار کی سیاست کا خاتمہ کریں گے۔
اے آر وائی نیوز کے مطابق وزیراعظم شہباز شریف نے مفتی محمود کانفرنس سے خطاب کرتے ہوئے کہا کہ ایک شخص دن رات بد دعائیں دے رہا تھا کہ ملک دیوالیہ ہوجائے وہ شخص چاہتا تھا کہ پاکستان کے حالات سری لنکا جیسے ہوجائیں۔
انہوں نے کہا کہ ہم نے محنت سے معیشت کو بہتر کرنے کی کوشش کی جبکہ گزشتہ حکومت نے بدنیتی کے ساتھ معیشت میں خرابیاں پیدا کیں انہوں نے جو معاہدے کیے اس کا بوجھ ہمیں اٹھانا پڑا۔
شہباز شریف نے کہا کہ جب 15 دن بعد پیٹرول ، گیس کی قیمتیں بڑھتی ہیں تو مجھے 2 راتیں نیند نہیں آتی ہے کل ہم نے دوبارہ نئی قیمت جاری کرنی ہے۔
وزیراعظم نے کہا کہ میرا یہ یقین ہے پاکستان کے 22 کروڑ عوام مشکلات سے نکل آئیں گے۔
انہوں نے کہا کہ سابق وزیراعظم جلسوں میں روز ویڈیو لگاتے ہیں اور کیا باتیں کرتے ہیں ہمیں سمجھ نہیں آتی ہے کبھی کہتا ہے جاپان اور جرمنی ہمسائے ہیں ملک کے خلاف سازش کرنا اس سے بڑا کوئی ظلم نہیں ہوسکتا۔
شہباز شریف کا کہنا تھا کہ آج سیاست میں گالم گلوچ سےآغازکیا جاتا ہے اوراسی پر اختتام کیا جاتا ہے لیکن مفتی محمود نے سیاست میں کبھی گفتگو کا دروازہ بند نہیں کیا انہوں نے ڈائیلاگ کو سیاست کا اہم جز قرار دیا۔