اسلام آباد: وزیر اعظم عمران خان نے وفاقی کابینہ کا اجلاس کل طلب کرلیا، اجلاس میں ایگزٹ کنٹرول لسٹ میں 172 نام شامل کرنے کا معاملہ زیر غور آئے گا۔
تفصیلات کے مطابق وزیر اعظم عمران خان کی زیر صدارت وفاقی کابینہ کا اجلاس کل ہوگا، اجلاس میں وفاقی کابینہ 20 نکاتی ایجنڈے کا جائزہ لے گی جو جاری کردیا گیا ہے۔
اجلاس میں ایگزٹ کنٹرول لسٹ میں 172 نام شامل کرنے کا معاملہ زیر غور آئے گا، وفاقی کابینہ ای سی ایل میں ڈالے گئے ناموں پر نظر ثانی کرے گی۔ پاکستان اور چین کے مابین سزا یافتہ قیدیوں کا تبادلہ بھی ایجنڈے میں شامل ہے۔
اجلاس میں یونین کونسل چیئرمینوں کی رجسٹریشن بھی زیر غور آئے گی۔
کابینہ غربت کے خاتمے کے حوالے سے رابطہ کونسل کے قیام، نرسنگ کونسل کے ممبران کی تعیناتی، دبئی ایکسپو کے لیے 50 لاکھ ڈالر گرانٹ اور قائد اعظم مزار مینجمنٹ بورڈ کی از سر نو شکیل کی منظوری دے گی۔
غیر معیاری اسٹنٹس کا معاملہ بھی کابینہ ایجنڈے میں شامل ہے جبکہ بی آر ٹی کے لیے فرنچ ڈویلپمنٹ ایجنسی کے لیے 130 ملین یورو کی منظوری بھی دی جائے گی۔
اجلاس میں کراچی ٹرانسفارمیشن کے لیے اعلیٰ اختیاراتی کمیٹی کے معاملے اور پاکستان اور جاپان کے مابین دفاعی تعاون بڑھانے پر بھی غور کیا جائے گا۔
خیال رہے کہ اس سے قبل وفاقی کابینہ کا اجلاس 27 دسمبر کو طلب کیا گیا تھا جس میں 20 نکاتی ایجنڈے پر غور کیا گیا۔
اجلاس میں صحت کے شعبے میں فلسطین سے معاہدے اور اسٹیل مل کے لیے ضمنی گرانٹ کی منظوری دی گئی تھی۔