جرمنی کے شہر برلن کے چڑیا گھر میں سفید ریچھ نے 32 سالہ خاتون پر حملہ کردیا۔
غیرملکی خبررساں ادارے کی رپورٹ کے مطابق خاتون نے ریچھ کے کھانے کے وقت پنجرے میں چھلانگ لگادی جس کے بعد پنجرے میں موجود ایک سفید ریچھ نے ان پر حملہ کرکے زخمی کردیا۔
ریچھ کے حملے کے بعد خاتون شدید زخمی ہوگئیں تاہم چڑیا گھر کی انتظامیہ نے خاتون کو پنجرے سے فوری باہر نکالا۔
حکام کا کہنا تھا کہ اس وقت پنجرے میں پانچ ریچھ موجود تھے، ایک ریچھ کے حملے میں خاتون کے بازوؤں پر گہرے زخم آئے تھے جبکہ عملے نے تمام ریچھوں کو الجھا کر خاتون کو حملے سے بچا لیا تھا۔
بعد ازاں چڑیا گھر کے اہلکاروں نے خاتون کو طبی امداد کیلئے اسپتال منتقل کردیا جہاں خاتون کا آپریشن کیا گیا، خاتون کی حالت خطرے سے باہر بتائی گئی ہے۔
واضح رہے کہ اس سے قبل ناروے میں ریچھ نے سیاحوں کے ایک کیمپ پر حملہ کر کے ایک خاتون سیاح کو زخمی کر دیا، ریچھ کو بعد ازاں ہلاک کر دیا گیا۔