اسلام آباد : صدر مملکت عارف علوی کی جانب سے آج ضمنی مالی بجٹ کی منظوری دیے جانے کا امکان ہے، منظوری سے ضمنی بل 2023 نافذ العمل ہوگا۔
تفصیلات کے مطابق قومی اسمبلی سیکرٹریٹ نے ضمنی مالی بل 2023توثیق کیلئےصدر مملکت کو بھیج دیا۔
ذرائع نے بتایا کہ صدر مملکت کی منظوری سے ضمنی بل 2023نافذ العمل ہوگا، صدر مملکت کی جانب سے آج ضمنی بل کی منظوری دینے کا امکان ہے۔
یاد رہے 20 فروری کو قومی اسمبلی نے ضمنی مالی بجٹ 2023 کی منظوری دی تھی اور اپوزیشن کی تمام ترامیم مسترد کر دی گئیں تھیں۔
قومی اسمبلی اجلاس میں اظہار خیال کرتے ہوئے وزیر خزانہ اسحاق ڈار نے کہا تھا کہ ضمنی مالیاتی بل کے حوالے سے ارکان کی تجاویز کا خیرمقدم کرتےہیں ضمنی مالیاتی بل کا قدم مجبوراً اٹھانا پڑا۔
انہوں نے کہا تھا کہ بجلی چوری، لائن لاسز اور بلز کی عدم ادائیگی سے پاور سیکٹر کو خسارے کا سامنا ہے، 1450 ارب روپے وصول نہیں ہو رہے، گزشتہ حکومت کی غلطیوں کی وجہ سے ملکی معیشت 24 سے 47ویں نمبر پر پہنچی موجودہ معاشی مسائل پی ٹی آئی حکومت کی ناقص پالیسیوں کانتیجہ ہیں۔