صدر مملکت آصف علی زرداری آج اولمپک گولڈ میڈلسٹ ارشد ندیم کو ہلال امتیاز کے اعزاز سے نوازیں گے۔
اے آر وائی نیوز کے مطابق آج ایوان صدر میں خصوصی تقریب ہوگی جس میں صدر مملکت آصف علی زرداری پیرس اولمپکس 2024 میں گولڈ میڈل حاصل کرنے والے جیولن ہیرو ارشد ندیم کو ہلال امتیاز سے نوازیں گے۔
واضح رہے کہ رواں 8 اگست کو فخر پاکستان ارشد ندیم نے پیرس اولمپکس کے جیولن تھرو فائنل میں 92.97 میٹر کی تھرو کر کے نہ صرف اولمپک کی تاریخ کا 118 سالہ ریکارڈ توڑا تھا بلکہ انہوں نے پاکستان کی تاریخ میں انفرادی سطح پر پہلا گولڈ میڈل بھی جیتا تھا۔
ارشد ندیم نے اس گولڈ میڈل سے قبل پاکستان نے آخری بار 1992 اولمپکس میں برانز میڈل ہاکی میں حاصل کیا تھا۔
ارشد ندیم کے اس قابل فخر کارنامے پر پاکستان سمیت دنیا بھر میں ان کے چرچے ہیں اور مملک بھر میں ان کی پذیرائی کا سلسلہ جاری ہے۔
وزیراعظم شہباز شریف نے جیولن ہیرو کو ہلال امتیاز دینے کی سفارش کی تھی جس کی صدر مملکت آصف زرداری نے گزشتہ دنوں منظوری بھی دی تھی۔ آج کی تقریب اسی سلسلے میں ہوگی۔