پاکستان انٹرنیشنل ایئرلائنز (پی آئی اے) کی نجکاری کے لیے گزشتہ روز کمیشن کے اجلاس میں تبادلہ خیال کیا گیا اور اس مقصد کے لیے واضح ٹائم لائن پر اتفاق کیا گیا۔
رپورٹ کے مطابق وزیر نجکاری فواد حسن فواد کی زیر صدارت اجلاس نگران وزیراعظم اور وفاقی کابینہ کی جانب سے پی آئی اے کی نجکاری کے لیے مقرر کردہ ہدف کو پورا کرنے کے لیے منعقد ہوا۔
فواد حسن فواد نے پی آئی اے انتظامیہ اور ایوی ایشن ڈویژن سمیت مختلف سٹیک ہولڈرز کے ساتھ تفصیلی بات چیت کی، جو پی آئی اے کی ری سٹرکچرنگ اور نجکاری کے عمل پر مرکوز تھی۔
تاہم نجکاری کمیشن کی جانب سے جاری کردہ پریس ریلیز میں مجوزہ ٹائم لائن کی کوئی تفصیلات نہیں بتائی گئیں۔
قبل ازیں فواد حسن فواد نے وزیر خزانہ ڈاکٹر شمشاد اختر سے ملاقات کی اور اہم اقتصادی اور مالیاتی امور پر بات چیت کی اور نجکاری کے ایجنڈے پر تبادلہ خیال کیا۔
Federal Minister for Privatisation Fawad Hasan Fawad chaired a meeting with different stakeholders regarding restructuring of PIA leading to a Privatisation process. Advisor to PM on Aviation along with key members of his team, senior management and legal/financial consultants of… pic.twitter.com/PnMuT7Zb0E
— PTV News (@PTVNewsOfficial) September 19, 2023
کابینہ کمیٹی برائے نجکاری (سی سی او پی) نے 6 ستمبر کو اپنے اجلاس میں پی آئی اے کی نجکاری اور ری سٹرکچرنگ کی راہ میں حائل رکاوٹوں کے حل کے لیے ایک تکنیکی کمیٹی بنانے کا فیصلہ کیا تھا۔
اس نے ایوی ایشن ڈویژن سے کہا تھا کہ وہ نجکاری کمیشن کے ساتھ مل کر سی سی او پی کو واضح ٹائم لائن فریم ورک کے ساتھ ایک تفصیلی ایکشن پلان فراہم کرے۔
پی آئی اے اپنی آپریشنل ضروریات کو پورا کرنے کے لیے مکمل طور پر حکومت، وزارت خزانہ اور مالیاتی اداروں کے کریڈٹ پر منحصر ہے۔
قومی ایئرلائن نے حال ہی میں حکومتِ پاکستان کی ضمانت کی حد کے تحت مالیاتی اداروں سے تازہ کریڈٹ سہولیات پر بات چیت کی ہے۔
یاد رہے کہ پی آئی اے نے 17 ارب روپے کا بینک قرض حاصل کرنے کے بعد اپنے فلائٹ آپریشنز میں اضافہ کیا ہے۔
اس سے قبل یہ خبریں سامنے آئی تھیں کہ پی آئی اے نے کئی طیاروں کو گراؤنڈ کرلیا کیونکہ اسے اپنے آپریشنز کو برقرار رکھنے کے لیے فنڈز کے حصول میں مشکلات درپیش تھیں۔ حکومت نے سپریم کورٹ کو بتایا کہ 2018 سے پی آئی اے سی ایل کو 114 بلین روپے دیے گئے ہیں۔
#PIA's financial challenges ease out as @GovtofPakistan supports with release of some critical funds through Banks. The funds shall be used to clear long standing dues of Aircraft & Engine leases, Spares Support & Handling payments at foreign stations. Restructuring also on track
— PIA (@Official_PIA) September 9, 2023
پی آئی اے نے 9 ستمبر کو سماجی رابطے کی ویب سائٹ ایکس پر ایک پیغام میں بتایا تھا کہ اسے حکومت کے تعاون سے بینکوں کے ذریعے "کچھ اہم فنڈز” موصول ہوگئے ہیں۔