ملک میں پانی سے سستی بجلی کی پیدوار بڑھنے لگی

اسلام آباد: دریاؤں اور آبی ذخائر میں پانی کی صورتحال میں بہتری کے نتیجے میں ملک میں پن بجلی سے سستی بجلی کی پیداوار بڑھنے لگی۔

17 جولائی کو پیک آورز میں پن بجلی گھروں سے 7 ہزار 286 میگاواٹ بجلی بنی۔ پن بجلی کی گزشتہ روز کی پیداوار رواں سال کی حاصل سب سے زیادہ بجلی ہے۔

آبی ذخائر کی سطح مزید بلند ہونے اور منگلا سے ارسا کا انڈنٹ بڑھنے سے پیداوار میں اضافہ ہوا۔ نیلم جہلم پروجیکٹ کی بحالی کے بعد پن بجلی کی پیداوار میں اضافہ بھی ہو جائے گا۔

گزشتہ روز پیک آورز کے دوران تربیلا سے 3 ہزار 446 میگاواٹ بجلی پیدا ہوئی۔ تربیلا چوتھے توسیع منصوبے سے 1410 میگاواٹ بجلی کی پیداوار رہی۔

17 جولائی کو غازی بروتھا سے 1450 میگاواٹ بجلی پیدا ہوئی۔ منگلا سے 275 میگاواٹ اور چشمہ سے 147 پن بجلی نیشنل گرڈ کو فراہم کی گئی۔

واپڈا کے دیگر پن بجلی گھروں سے 386 میگاواٹ بجلی کی پیداوار رہی۔ واپڈا پن بجلی کی اوسط پیداواری لاگت 3 روپے 51 پیسے فی یونٹ ہے۔