پی سی بی اور پی ایس ایل فرنچائزر کا مشاورتی اجلاس آج ہو رہا ہے جس میں ایونٹ کے رواں سیزن کے لاہور اور پنڈی کے میچز کراچی منتقل کیے جانے کا فیصلہ ہونے کا امکان ہے۔
اے آر وائی نیوز کے مطابق پاکستان کرکٹ بورڈ کی منیجمنٹ کمیٹی کے سربراہ نجم سیٹھی کی سربراہی میں پی ایس ایل کی فرنچائزز کا مشاورتی آن لائن اجلاس آج ہو رہا ہے۔ جس میں فرنچائز مالکان شرکت کریں گے۔
اس اجلاس میں رواں پاکستان سپر لیگ 8 کے لاہور اور راولپنڈی کے میچز کراچی منتقل کرنے کا فیصلہ کیے جانے کا امکان ہے۔
پی سی بی کے ایک اعلیٰ عہدیدار نے اس حوالے سے بتایا کہ دونوں شہروں کی ضلعی انتظامیہ کی جانب سے میچز کرانے کیلیے 50 کروڑ روپے ادائیگی کا مطالبہ کیا گیا ہے۔ ضلعی حکومت نے میچز کرانے کیلیے 50 کروڑ روپے کے بل بھیج دیے ہیں۔ یہ بل لائٹنگ، کھانے اور سیکیورٹی کی مد میں بھیجے گئے ہیں۔ کراچی میں میچز کرانے کیلئے یہ اخراجات ادا کرنے نہیں پڑتے۔
ذرائع کا کہنا ہے کہ پی سی بی نے سیکیورٹی فورسز کھانے پینے کی مد میں مذکورہ اضلاع کو 5 کروڑ کی ادائیگی کر دی ہے جب کہ سندھ حکومت نے سیکیورٹی فورسز کے کھانے کی مد میں صرف تین کروڑ لئے ہیں۔ پی سی بی یہ اخراجات بچانے کے لیے میچز کراچی منتقل کرنا چاہتا ہے۔
ذرائع کے مطابق آج کے اجلاس میں یہ تعین کیا جائے گا کہ اگر یہ پیمنٹ کرنی ہے تو کون یہ بوجھ برداشت کرے گا۔ میچز کراچی منتقل کرنے ہیں تو وہ کتنے ہوں گے۔
واضح رہے کہ راولپنڈی نے پاکستان سپر لیگ کے 11 میچوں کی میزبانی کرنی ہے جب کہ لاہور ایونٹ کے فائنل سمیت مجموعی طور پر 9 میچز کا میزبان ہے۔