پی ٹی آئی کا اے آر وائی نیوز کا ایک دن کے بائیکاٹ کا اعلان، رپورٹر خبر پر قائم

پاکستان تحریک انصاف کی جانب سے اے آر وائی نیوز کا ایک دن کے بائیکاٹ کا اعلان کیا گیا ہے، تاہم چینل کے رپورٹر اپنی خبر پر قائم ہیں۔

اے آر وائی نیوز کے مطابق تحریک انصاف کے مرکزی سیکریٹری جنرل شیخ وقاص اکرم نے کہا ہے کہ پی ٹی آئی آج اے آر وائی نیوز کا ایک دن کیلئے بائیکاٹ کررہی ہے، اے آر وائی نیوز نے علیمہ خانم، بیرسٹر سیف اور علی گنڈاپور سے متعلق بےبنیاد خبر نشر کی

شیخ وقاص اکرم نے مزید کہا کہ سینیٹ میں ٹکٹوں کی تقسیم سے متعلق پروپیگنڈا کیا گیا، پارٹی سے مشاورت کرینگے کہ بائیکاٹ ایک دن سے زیادہ جاری رکھنا ہے یا نہیں۔

پی ٹی آئی کے سیکریٹری جنرل نے کہا کہ ذرائع سے خبر چلانا صحافی کا حق ہے لیکن جن کا نام لیا گیا ہے ان کا مؤقف لینا چاہیے۔

شیخ وقاص نے کہا کہ غیرمصدقہ خبر چلانے سے پہلے پی ٹی آئی کا موقف لینا چاہیے تھا، آج اے آر وائی نیوز کے کسی پروگرام میں کوئی رہنما شرکت نہیں کریگا۔

نعیم اشرف بٹ ہیڈ آف انویسٹی گیٹیو سیل نے اے آر وائی نیوز سے گفتگو کرتے ہوئے بتایا کہ ہم اپنی خبر پر قائم ہیں ایک نہیں دو نہیں چار لوگوں نے ہمیں کنفرم کیا جو میٹنگ میں وہاں موجود تھے۔

ہم نے اپنے ذرائع کا نام نہ پہلے لیا ہے اور نہ اب لیں گے، یہ کنفرم ہے اور چار میں تین خبروں کا شیخ وقاص اکرم نے ذکر تک نہیں کیا۔

https://urdu.arynews.tv/senate-election-tickets-tensions-within-pti/