اسلام آباد (22 اگست 2025): چیئرمین پی ٹی آئی بیرسٹر گوہر نے بونیر میں سیلاب سے تباہی کی دل دہلا دینے والی تصویر سوشل میڈیا پر شیئر کی ہے۔
پاکستان اس وقت طوفانی بارشوں اور سیلاب کی زد میں ہے۔ گزشتہ ہفتے صوبہ خیبر پختونخوا میں کلاؤڈ برسٹ، طوفانی بارش اور سیلابی ریلوں سے تاریخ کی بدترین تباہی ہوئی۔ 350 سے زائد افراد جاں بحق ہوئے، درجنوں اب بھی لاپتہ ہیں جب کہ اربوں مالیت کا مالی نقصان ہوا ہے۔
سب سے زیادہ تباہی ضلع بونیر میں آئی جہاں سیلابی ریلوں اور بجلی گرنے سے 250 سے زائد قیمتی جانیں ضائع ہوئیں۔ آن کی آن میں پورے پورے گاؤں صفحہ ہستی سے مٹ گئے، خاندان اجڑ گئے۔
اسی بونیر سے تباہی کی ایک اور دل دہلا دینے والی تصویر پی ٹی آئی چیئرمین بیرسٹر گوہر نے سوشل میڈیا پلیٹ فارم ایکس پر شیئر کی ہے، جو وہاں ہونے والی تباہی کی شدت بیان کر رہی ہے۔
اس تصویر میں دیوہیکل پتھروں تلے ایک کار دبی ہوئی ہے اور مکمل طور پر کچل چکی ہے۔ نہیں معلوم کہ کار میں کوئی سوار تھا یا نہیں۔
اس دلخراش تصویر کے ساتھ چیئرمین پی ٹی آئی نے اپنا دکھ لفظوں میں بیان کرتے ہوئے لکھا ہے کہ بونیر کے حالیہ سیلاب کی یہ تصویر ہزار لفظوں کے برابر ہے اور سیلاب کی تباہ کاریوں کی شدت بیان کرتی ہے۔
This picture of Buner Flood last Friday is worth a thousand words. This reflects on the magnitude of flood. We are trying to help our people rebuild from scratch. Please don’t leave us alone in this struggle. I request everyone to help us. May God protect us all, Aameen. pic.twitter.com/Xs4i82c1FV
— Barrister Gohar Khan (@BarristerGohar) August 22, 2025
بیرسٹر گوہر نے کہا کہ اس موقع پر ہماری مدد کرنے والوں کا شکریہ ادا کرتے ہیں۔ اپنے لوگوں کو دوبارہ سہارا دینےکی کوشش کر رہے ہیں۔ اللہ تعالیٰ ہمیں اس جدوجہد میں اکیلا نہ چھوڑے اور سب کی حفاظت فرمائے۔
https://urdu.arynews.tv/kp-flood-entire-villages-buried-in-buner-debris-turns-into-mass-graves-video-report/