جے یو آئی (ف) کے سربراہ مولانافضل الرحمان سے حالیہ ملاقات کے حوالے سے رہنما تحریک انصاف کی وضاحت سامنے آگئی۔
اے آر وائی کے پروگرام آف دی ریکارڈ میں گفتگو کرتے ہوئے پاکستان تحریک انصاف کے رہنما بیرسٹر محمد سیف کا کہنا تھا کہ فضل الرحمان سے ملاقات میں الیکشن اور کے پی کی صورتحال پر زیادہ گفتگو ہوئی۔ فضل الرحمان نے کہا کہ سب پارٹیوں کو لیول پلیئنگ فیلڈ ملنی چاہیے۔
بیرسٹر سیف نے کہا کہ مولانا فضل الرحمان کے پاس تعزیت کیلئے گئے تھے۔ ہماری فضل الرحمان سے سوشل ملاقات تھی سیاسی نہیں۔
انھوں نے کہا کہ جے یو آئی اور پی ٹی آئی کا ساتھ مل کر چلنے کی بات قبل ازوقت ہے۔ الیکشن کمیشن کی جانب سے ابھی تک الیکشن کی تاریخ کا اعلان نہیں ہوا۔
بیرسٹرسیف کا مزید کہنا تھا کہ سیاست میں حتمی رائے نہیں دی جاسکتی، اتحاد پر کچھ کہنا قبل ازوقت ہوگا۔ ماضی سے اچھا سبق سیکھ کر آگے کا سوچیں تو مستقبل بہتر ہوسکتا ہے۔
انھوں نے کہا کہ تلخیاں ختم کرنے کیلئے مولانافضل الرحمان کے پاس ملاقات کیلئے گئے۔ ذاتی رنجشیں ختم کر کے سیاسی مخالفت ہونی چاہیے۔
رہنما تحریک انصاف نے کہا کہ نواز شریف انصاف کیلئے جس طر منتظر ہیں کاش ایسا سب کیلئے بھی ہوتا۔ ماضی کے تلخ تجربات کو مستقبل پر حاوی نہیں ہونا چاہیے۔ ن لیگ کے علاوہ سب جماعتیں لیول پلیئنگ فیلڈ کی بات کررہی ہیں۔