اسلام آباد: پاکستان تحریک انصاف (پی ٹی آئی) کے احتجاج اور جڑواں شہروں اسلام آباد اور راولپنڈی میں داخلی اور خارجی راستوں کی بندش کے باعث کل تمام نجی تعلیمی اداروں کو بند رکھنے کا اعلان کر دیا گیا۔
وفاقی دارالحکومت میں کل تمام تعلیمی ادارے بند رہیں گے جس کا نوٹیفکیشن جاری کر دیا گیا۔ راولپنڈی اور مری کے تمام تعلیمی ادارے بھی کل بند رہیں گے۔ ضلعی انتظامیہ نے کہا ہے کہ تعلیمی ادارے بند رکھنے کا فیصلہ امن و امان کے پیش نظر کیا گیا۔
آل پاکستان پرائیویٹ اسکولز اینڈ کالجز ایسوسی ایشن نے اعلان کیا کہ جڑواں شہروں کے نجی تعلیمی ادارے کل بند رہیں گے، کل ممکنہ احتجاج پر جڑواں شہروں کے تعلیمی ادارے بند رکھے ہیں۔
ایسوسی ایشن کے صدر ڈاکٹر ابرار نے کہا کہ تعلیمی اداروں میں چھٹی کا فیصلہ راستوں کی بندش اور بچوں کی حفاظت کے پیش نظر کیا گیا، دو ردراز علاقوں میں صورتحال دیکھ کرتعلیمی ادارے کھولنے یا بند کرنے کا فیصلہ کیا جائے۔
انٹرنیشنل اسلامک یونیورسٹی بھی کل بند رہے گی، یونیورسٹی انتظامیہ نے پیر کی چھٹی کے احکامات جاری کر دیے۔
پی ٹی آئی احتجاج کے پیش نظر راولپنڈی اور اسلام آباد کو مکمل طور پر سیل کر دیا گیا ہے جبکہ لاہور اور فیصل آباد سے وفاقی دارالحکومت کو آنے والے تمام راستے بند کر دیے گئے ہیں۔ فیض آباد فلائی اوور پر کنٹینر کی دیواریں لگا دیں گئی جبکہ جگہ جگہ پر پولیس کی بھاری نفری تعینات ہے۔
مری روڈ مختلف مقامات پر کنٹینرز لگا کر بند کر دیا گیا۔ موٹروے، روات، ٹی چوک ٹیکسلا، مارگلہ مندرہ، مری گلیات روڈ، مری ایکسپریس وے، ہزارہ ایکسپریس وے پنجاب سے ملنے والی شاہراہ کو بھی بند کر دیا گیا۔
اسلام آباد اور راولپنڈی کی تمام رابطہ سڑکوں کو مکمل سیل کیا جائے گا، جڑواں شہروں کو 33 مقامات سے بند کرنے کا سلسلہ جاری ہے۔
راولپنڈی میں سیکیورٹی کے سخت انتظامات کیے گئے ہیں 6 ہزار سے زائد پولیس اہلکار کو تعینات کیا گیا ہے جبکہ مختلف علاقوں میں قیدی بسیں پہنچادی گئی۔
ایم ون پشاور موٹروے بند
ایم ون پشاور موٹروے کو ہر قسم کی ٹریفک کے لیے بند کردیا گیا، موٹر وے بند ہونے سے ٹول پلازہ پر گاڑیوں کی قطاریں لگ گئی جس سے شہریوں کو شدید مشکلات کا سامنا ہے۔
موٹروے حکام کا کہنا ہے کہ پشاور موٹروےکو دھند کے باعث بند کیا گیا ہے، موٹر وے پشاور ایم ون سے رشکئی تک دھند کے باعث بند ہے۔
شہر کے اسپتالوں میں ایمرجنسی نافذ
شہر کے اسپتالوں میں ایمرجنسی نافذ کردی گئی ہے جبکہ ریسکیو ادارےکو بھی الرٹ جاری کردیا گیا ہے،
میٹرو بس سروس بند، پنجاب بھر میں دفعہ 144 نافذ
لاہور اور اسلام آباد میٹرو کو بھی بند کر دیا گیا ہے، میٹرو بس ٹریک پر بیرئیر لگا دیے گئے ہیں، میٹرو سروس تاحکم ثانی مکمل بند رہے گی۔
پنجاب بھر میں آج سے 25 نومبر تک دفعہ 144 نافذ کر دی گئی ہے جس کے تحت ہر قسم کے احتجاج، جلسے جلوس، ریلیوں اور دھرنوں پر پابندی عائد رہے گی۔
شہروں میں انٹرنیٹ سروس بند
ذرائع وزارت داخلہ کے ترجمان کا کہنا ہے وفاقی حکومت نے پاکستان تحریک انصاف کے احتجاج کے باعث پنجاب کے بڑے شہروں میں انٹرنیٹ سروس بند کرنے کا فیصلہ کیا ہے۔
ذرائع کا کہنا ہے کہ جہاں سیکیورٹی خدشات ہیں وہاں صورت حال کے مطابق انٹرنیٹ سروس بند ہوگی، تاہم ملک کے دیگر حصوں میں انٹرنیٹ اور موبائل فون سروس معمول کے مطابق چلتی رہے گی۔
دوسری جانب ملک کے مختلف علاقوں میں انٹرنیٹ میں خلل سے صارفین کو مشکلات کا سامنا ہے، کراچی، راولپنڈی، ڈی آئی خان اور دیگر کئی شہروں میں انٹرنیٹ سروسز شدید متاثر ہیں، بعض علاقوں میں انٹرنیٹ کی رفتار انتہائی سست ہونے کے سبب سوشل میڈیا ایپس کام نہیں کر رہی ہیں۔