اسلام آباد: پاکستان تحریک انصاف (پی ٹی آئی) کی کور کمیٹی نے پنجاب کے مختلف حلقوں میں ووٹوں کی دوبارہ گنتی کا عمل غیر آئینی قرار دے دیا۔
پی ٹی آئی کی کور کمیٹی کے اجلاس کا اعلامیے جاری کیا گیا جس میں کہا گیا ہے کہ ہماری آئینی نشستیں چھین کر غیر قانونی طور پر مسلم لیگ (ن) کو دی جا رہی ہیں۔
کور کمیٹی نے مطالبہ کیا کہ پی ٹی آئی امیداروں کے پاس موجود حقیقی فارم 45 کی روشنی میں آڈٹ کیا جائے، چوری شدہ تمام نشستیں آئین و قانون کے مطابق واپس کی جائیں۔
اجلاس میں بانی پی ٹی آئی کو جعلی مقدمات میں بغیر آئینی جواز پابند سلاسل رکھنے کی مذمت کی گئی۔
کور کمیٹی نے کہا کہ توشہ خانہ اور سائفر جیسے جھوٹے مقدمات میں عجلت میں سزائیں دی گئی، بانی پی ٹی آئی کو انتقام کا نشانہ بنانے کے عزائم پوری طرح آشکار ہو چکے ہیں۔
پی ٹی آئی نے کہا کہ عدالتی فیصلوں کے خلاف اپیلوں کی کارروائی میں بلا جواز تاخیر کی کوشش کی جا رہی ہے، جھوٹے کیسز کا خاتمہ کر کے بانی پی ٹی آئی کی رہائی کے احکامات جاری کیے جائیں۔
کور کمیٹی نے بشریٰ بی بی کی صحت، زندگی کو لاحق خطرات اور سکیورٹی پر تحفظات کا اظہار کرتے ہوئے کہا ہے کہ بشریٰ بی بی کو مرضی کے خلاف بنی گالہ سب جیل میں قید رکھنے کی شدید مذمت کرتے ہیں۔
اعلامیے کے مطابق بشریٰ بی بی کو سکیورٹی کی فراہمی اور صحت کو لاحق خطرات کے فوری ازالے کا مطالبہ کرتے ہیں۔