سابق وزیراعظم پاکستان نواز شریف نے کہا ہے کہ پاکستان تحریک انصاف کی احتجاج کی کال ملک کو ڈی ریل کرنے کی مذموم کوشش ہے۔
اے آر وائی نیوز کے مطابق صدر پاکستان مسلم لیگ ن نوازشریف نے لندن سے وطن واپسی پر میڈیا سے گفتگو کرتے ہوئے کہا کہ تحریک انصاف نے احتجاج کی کال دی یہ پاکستان کوڈی ریل کرنے کی کوشش ہے، انتشار اور فساد پھیلانے والے عناصرکامیاب نہیں ہونگے۔
لندن میں وطن واپسی سے قبل گفتگو کرتے ہوئے سابق وزیراعظم نواز شریف کا کہنا تھا کہ دوبارہ خلل نہ ڈالا گیا تو ہم حالات سنوار لیں گے۔
نواز شریف کا کہنا تھا کہ بانی پی ٹی آئی نے قمر باجوہ اور فیض حمید کے ساتھ مل کر ہمارے خلاف کیا کچھ نہیں کیا، ہم نے بدترین ظلم برداشت کیے یہ کس بات کا طعنہ دیتے ہیں، 3 بار کے وزیراعظم کو جیل میں اطلاع ملی کہ بیوی فوت ہوگئی۔
انھوں نے کہا کہ پی ٹی آئی اپنا کوئی ایک منصوبہ دکھا دے جس پر وہ فخر کرسکیں، ان کی کارکردگی صفر ہے، عدلیہ سے ساز باز کرکے منتخب وزیراعظم کو ہٹایا گیا۔
صدر ن لیگ کا کہنا تھا کہ پی ٹی آئی نے پاکستان کی ساکھ کو نقصان پہنچانے کے علاوہ کچھ نہیں کیا، 26ویں آئینی ترمیم خوش آئند اور بہترین ہے، پارلیمنٹ نے پہلے بھی ایسی ترمیم کی جسے اس وقت کی عدلیہ نے ختم کیا۔