لاہور: پنجاب اسمبلی میں بڑا بریک تھرو سامنے آگیا جہاں اسپیکر ملک احمد خان نے پاکستان تحریک انصاف (پی ٹی آئی) کے معطل 11 ارکان کی بحالی کا نوٹیفکیشن جاری کر دیا۔
پی ٹی آئی ارکان کو اسپیکر اسمبلی ملک احمد خان کی ہدایت پر اخلاقیات کمیٹی کی سفارش پر بحال کیا گیا۔
اپوزیشن اور حکومتی بینچوں میں احترام اور مؤثر گورننس کیلیے کمیٹی برائے اخلاقیات کا اجلاس ہوا جس کی صدارت اسپیکر اسمبلی نے کی۔ اجلاس میں اپوزیشن اور حکومتی بینچوں کے 11 معزز اراکین نے شرکت کی۔
کمیٹی نے متفقہ طور پر اپوزیشن کے 11 معطل اراکین اسمبلی کی بحالی سفارش کی جس کے بعد اسمبلی سیکرٹریٹ نے معطل اراکین کی بحالی کا نوٹیفکیشن جاری کیا۔
اخلاقیات کمیٹی کو ایوان کی مستقل کمیٹی کے طور پر قواعد و ضوابط کا حصہ بنایا جائے گا جبکہ کمیٹی اراکین کے طرز عمل کی غیر جانبدار اور شفاف بنیاد پر نگرانی میں اہم کردار ادا کرے گی۔
ایوان میں کسی بھی رکن کی تضحیک اور بدنامی کے خلاف زیرو ٹالرنس پالیسی، قائد ایوان اور قائد حزب اختلاف کے پارلیمانی حقوق اور روایات کے تحفظ کو یقینی بنانے پر اتفاق ہوا۔
فیصلہ کیا گیا کہ اسمبلی کارروائی کے دوران کسی رکن کو فحش، نازیبا الفاظ اور گالم گلوچ کی اجازت نہیں ہوگی۔ کمیٹی نے خواتین اراکین سے متعلق ہتک آمیز الفاظ پر پابندی اور احترام یقینی بنانے پر متفقہ طور پر اتفاق کیا۔
کمیٹی اجلاس کے دوران ماضی میں ہوئے ایسے واقعات کی شدید مذمت بھی کی گئی۔