بھارتی پنجاب کے وزیراعلیٰ بھگونت مان جو خود بھی ماضی میں شوبز انڈسٹری سے تعلق رکھتے تھے دلجیت دوسانجھ کی فلم ’سردار جی 3 ‘ کی حمایت میں سامنے آگئے۔
صوبائی اسمبلی میں تقریر کرتے ہوئے بھارتی پنجاب کے وزیراعلیٰ نے پاکستانی اسٹار ہانیہ عامر کے ساتھ کام کرنے والے دلجیت دوسانجھ کے ساتھ یکجہتی کا اظہار کیا، بھگونت مان نے سکھوں کے ساتھ بھارتی حکومت کے رویے کو زبردست تنقید کا نشانہ بنایا۔
بھگونت مان کا کہنا تھا کہ جس فلم پر تنقید کی جارہی ہے اس کی شوٹنگ پہلگام واقعے سے پہلے ہوچکی تھی، پنجابیوں کا کلچر، زبان اور روایات چاہے وہ سرحد کے اس طرف ہوں یا اُس طرف، ایک جیسی ہے۔
پاکستان کے پنجاب میں رہنے والے بھی پنجابی بولتے ہیں ہم بھی پنجابی بولتے ہیں لیکن نہیں دلجیت دوسانجھ کی فلم ریلیز نہیں ہونے دیں گے اسے غدار کہہ دیا گیا۔
بھارتی پنجاب کے وزیراعلیٰ نے کہا کہ ملک پنجاب نے لےکر دیا ہے اب ہمیں ہی غدار کہا جاتا ہے، لڑائیاں پنجاب نے لڑی ہیں، ہم سے بڑا دیش بھگت کوئی نہیں، پنجاب کا قصور کیا ہے۔
انھوں نے تلخ لہجے میں کہا کہ کبھی کہا جاتا ہے کہ پاکستان سے لڑو پھر کہا جاتا ہے کہ اب پاکستان کے ساتھ ٹھیک ہو جاؤ، پنجاب میں رہنے والوں کو بھیڑ بکریاں سمجھا ہوا ہے؟
خیال رہے کہ بھارتی پنجابب سے تعلق رکھنے والے اداکار دلجیت دوسانجھ اور ہانیہ عامر کی فلم سردار جی 3 کو بھارت میں ریلیز نہیں کیا گیا اس کے باوجود دلجیت پر بھارتی انتہاپسندوں کی جانب سے تنقید کا سلسلہ جاری ہے۔
https://urdu.arynews.tv/sardaar-ji-3-box-office-collection-first-week/