لاہور : وزیراعلیٰ پنجاب محسن نقوی نے چین کے قونصل جنرل سے ملاقات میں اسموگ سے نمٹنے کیلئے بیجنگ اکیڈمی آف سائنس اینڈ ٹیکنالوجی سے معاونت حاصل کرنے کا اصولی فیصلہ کرلیا ، چینی کمپنی کے اشتراک سے ایئرکوالٹی مانیٹرنگ سسٹم لگایا جائے گا۔
تفصیلات کے مطابق وزیراعلیٰ پنجاب محسن نقوی سے وزیر اعلیٰ آفس میں چین کے قونصل جنرل ژاؤ شیریں نے ملاقات کی، جس میں سموگ کے خاتمے کیلئے باہمی تعاون کے امکانات کا جائزہ لیا گیا۔
ملاقات میں اسموگ سے نمٹنے کے لئے بیجنگ اکیڈمی آف سائنس اینڈ ٹیکنالوجی سے ٹیکنیکل معاونت حاصل کرنے کا اصولی فیصلہ کیا گیا اور اس امر پر اتفاق کیا گیا کہ لاہور میں چینی کمپنی کے اشتراک سے ایئرکوالٹی مانیٹرنگ سسٹم لگایا جائے گا۔
ملاقات میں پنجاب اور چین کے ماحولیاتی امور کے ماہرین کے فوری رابطوں پر اتفاق کیا گیا، وزیر اعلیٰ محسن نقوی نے چینی قونصل جنرل سے گفتگو کرتے ہوئے کہا کہ اسموگ سے نمٹنے کے لئے چین سے ٹیکنیکل معاونت اور جدید آلات کے حصول کے لئے کوشاں ہیں، اسموگ کے خاتمے کے لئے طویل المدتی پالیسی اختیار کررہے ہیں، لاہور میں سموگ کا بڑی وجہ انڈیا میں فصلوں کی باقیات کو بڑے پیمانے پر جلا نا ہے۔
وزیر اعلیٰ کا کہنا تھا کہ دورہ چین کی کامیابی کے لئے چینی قونصل جنرل اور قونصلیٹ کے تعاون کے مشکور ہیں، ننشیا کے پارٹی سیکرٹری اور دیگر حکام کی مہمان نوازی تادیر یاد رہے گی۔
انہوں نے کہا کہ چین کی طرز پر پنجاب میں بھی ٹورسٹ پولیس قائم کی جارہی ہے، ایگریکلچر ریسرچ،واٹر مینجمنٹ اور دیگرامور میں چین کی مہارت میں فائدہ اٹھانا چاہتے ہیں۔
چینی قونصل جنرل ژاؤ شیریں نے وزیر اعلیٰ محسن نقوی سے گفتگو کرتے ہوئے کہا کہ حکومت پنجاب سموگ کے خاتمے کے لئے قابل قدر اقدامات کررہی ہے۔پنجاب میں اینٹوں کے بھٹوں میں زگ زیگ ٹیکنالوجی کے استعمال سمیت دیگر اقدامات قابل ستائش ہیں اور لاہور میں ڈپلومیٹک انکلیو قائم کرنے پر حکومت پنجاب کا شکریہ ادا کرتے ہیں۔