لاہور : آئندہ دو دن کے لیے موسلادھار بارشوں کا الرٹ جاری کردیا گیا ، جس میں شہریوں کو احتیاطی تدابیر اختیار کرنے کی ہدایت کی گئی ہے۔
تفصیلات کے مطابق پی ڈی ایم اے نے پنجاب کے بیشتر علاقوں میں آئندہ دو دن کے لیے موسلادھار بارشوں کا الرٹ جاری کردیا۔
جس میں شہریوں کو احتیاطی تدابیر اختیار کرنے کی ہدایت کی گئی ہے۔
پی ڈی ایم اے کا کہنا ہے مون سون بارشوں کا یہ سلسلہ دس جولائی تک جاری رہنے کا امکان ہے، آئندہ 24 گھنٹوں میں پنجاب کے بیشتر علاقوں میں شدید مون سون بارشیں متوقع ہیں۔
مزید پڑھیں : ملک بھر میں مون سون بارشوں کا سلسلہ شدت اختیار کر گیا
دوسری جانب لاہور سمیت پنجاب کے مختلف اضلاع میں ہونے والی مون سون بارشوں کے بارے میں پی ڈی ایم اے نے رپورٹ جاری کر دی۔
جس میں بتایا کہ سب سے زیادہ بارش شیخوپورہ میں اڑتالیس ملی میٹر، لاہور چالیس، گوجرانوالہ چھ ، مری میں پانچ، فیصل آباد میں چار، سیالکوٹ دو اور منڈی بہاالدین میں ایک ملی میٹر بارش ریکارڈ کی گئی۔
ترجمان کے مطابق اٹک، ٹوبہ ٹیک سنگھ ، بہاولنگر، قصور اور بہاولپور میں بھی بارش ریکارڈ کی گئی۔
بارش سے ہونے والے نقصانات سے متعلق رپورٹ جاری کی گئی ، جس کے مطابق بونیر، ملاکنڈ، کرک مانسہرہ، مہمند اورچارسدہ میں حادثات پیش آئے اور مجموعی طور پرآٹھ گھروں کو نقصان پہنچا۔
رپورٹ میں بتایا گیا کہ خیبرپختونخوا میں اڑتالیس گھنٹے کے دوران بارشوں اورسیلاب سے چھ افراد جاں بحق اور سات زخمی ہوئے۔