بھارتی پنجابی فلموں کے مقبول ترین اداکار و کامیڈین جسوندر سنگھ بھلا 65 برس کی عمر میں چل بسے، ان کے اہلخانہ نے موت کی تصدیق کردی ہے۔
بھارتی میڈیا رپورٹس کے مطابق تجربہ کار اداکار اور کامیڈین جسوندر سنگھ بھلا جمعہ کی صبح موہالی کے فورٹس اسپتال میں انتقال کر گئے، ان کے قریبی دوست شرما بالمک نے ان کی موت کی تصدیق کی ہے۔
بھارتی میڈیا رپورٹس کے مطابق مزاحیہ اداکار کے اہلِ خانہ نے بتایا کہ انہیں برین اسٹروک کے بعد اسپتال میں داخل کیا گیا تھا، جسوندر سنگھ بھلا کی آخری رسومات 23 اگست بروز ہفتہ دوپہر 12 بجے موہالی میں ادا کی جائیں گی، جس میں پنجابی فلم انڈسٹری سے وابستہ شخصیات کی شرکت متوقع ہے۔
اداکار کے انتقال کی خبر نے فلم انڈسٹری کو گہرے صدمے میں ڈال دیا ہے۔ ان کے انتقال سے پنجابی فلم انڈسٹری ایک بڑے فنکار سے محروم ہو گئی ہے جنہوں نے اپنے منفرد انداز سے کامیڈی کو ایک نئی پہچان دی۔
واضح رہے کہ جسوندر سنگھ بھلا نے اپنے کیریئر کا آغاز 1988 میں کامیڈی البم ’چھنکاتا 88‘ سے کیا، انہوں نے درجنوں سپرہٹ پنجابی فلموں میں کردار ادا کیے۔ ان کی یادگار فلموں میں کیری آن جٹا، بھاجی ان پرابلم، منجھے بسسراں دے، سجن سنگھ رنگروٹ اور جٹ اینڈ جولیٹ جیسی فلمیں شامل ہیں۔