لاہور : وزیراعظم شہباز شریف نے پنجاب میں گندم کی خریداری اور کسانوں کو بار دانے کے حصول میں دشواری کا نوٹس لے لیا۔
تفصیلات کے مطابق وزیرِ اعظم محمد شہباز شریف نے گندم کی خریداری پر پیش رفت اور بار دانے کے حصول میں کسانوں کو درپیش مشکلات کا نوٹس لیتے ہوئے اعلیٰ سطح کا ہنگامی اجلاس سے خطاب کیا۔
اجلاس میں وفاقی وزراء رانا تنویر حسین، عطاء اللہ تارڑ اور متعلقہ اعلیٰ حکام نے شرکت کی، اس موقع پر شرکاء کو گندم کی خریداری کے حوالے سے پیش رفت پر تفصیلی بریفنگ دی گئی۔
لاہور میں ہنگامی اجلاس کی صدارت کرتے ہوئے انہوں نے دریافت کیا کہ گندم خریداری کیلئے کسانوں کو باردانے کے حصول میں مشکلات کیوں درپیش ہیں؟
وزیراعظم نے کہا کہ اللہ کے فضل وکرم سے رواں سال گندم کی بمپر فصل ہوئی ہے، کسانوں کو ان کی محنت کا معاوضہ بروقت پہنچائیں گے اور ان کی محنت کو کسی کی غفلت کی بھینٹ نہیں چڑھنے دوں گا۔
انہوں نے کہا کہ کسانوں کے معاشی تحفظ پر سمجھوتہ قبول نہیں،افسران گندم کی خریداری کی موقع پرجا کرخود نگرانی کریں۔
شہباز شریف کا کہنا تھا کہ حکومت پاسکو کےتحت1.8ملین میٹرک ٹن گندم خریدنے جارہی ہے، وزیر اعظم نے تحفظات دورکرنے کیلئے وزارت قومی غذائی تحفظ کی کمیٹی قائم کردی، کمیٹی 4روز میں کسانوں کے تحفظات دورکرنے کیلئے اقدامات کرے گی۔