قومی کرکٹر اعظم خان نے پی ایس ایل 8 میں اسلام آباد کی نمائندگی کرتے ہوئے اپنی سابقہ فرنچائز کوئٹہ کے خلاف دھواں دھار اننگز سے متعلق دلچسپ واقعہ سنایا ہے۔
قومی ٹیم کے جارح مزاج بیٹر اعظم خان نے پروگرام دی فورتھ امپائر میں شرکت کی اور میزبان فہد مصطفیٰ کی جانب سے پوچھے گئے دلچسپ سوالات کے جوابات دیے۔
اعظم خان نے بتایا کہ اس دن 70 پر 4 آؤٹ ہونے کے بعد لگتا نہیں تھا کہ بڑا اسکور کریں گے لیکن میری اور آصف علی کی پارٹنرشپ لگ گئی اور پھر جو بیٹنگ ہوئی تو اسکور بڑا ہو گیا۔
بلے باز نے بتایا کہ والد معین خان جو کہ کوئٹہ گلیڈی ایٹرز کے کوچ تھے انہوں نے ڈانٹا کہ تم ہمیشہ ہمارے خلاف ہی اسکور کر دیتے ہو۔
میزبان نے پوچھا کہ قومی ٹیم میں بہترین وکٹ کیپر بیٹر کون ہیں، کامران اکمل، سرفراز احمد یا پھر اعظم خان؟
اعظم خان نے ان سب کو چھوڑ کر کر کہا کہ میرے ابا (معین خان۔)
ان سے سوال کیا گیا کہ ان میں کس ہیروئن کا بھائی بننے سے انکار کردیں گے؟ مایا علی، اشنا شاہ، یا پھر ہانیہ عامر؟
اعظم خان نے کہا کہ ’ہانیہ عامر کا بھائی بننے سے انکار کردیں گے۔‘