نئی دہلی : کانگرس رہنما راہول گاندھی نے غزہ میں فلسطینیوں کے قتل عام کی مذمت کرتے ہوئے کہا کہ اسرائیل اور فلسطین میں انتشار کا سلسلہ اب بند ہوجانا چاہیے۔
تفصیلات کے مطابق کانگرس رہنماراہول گاندھی نے غزہ میں قتل عام کی مذمت کرتے ہوئے کہا ہے کہ غزہ میں بچوں سمیت ہزاروں بےگناہ شہریوں کاقتل جرم ہے، لاکھوں لوگوں کی خوراک بندکرنا انسانیت کےخلاف جرم ہے۔
راہول گاندھی کا کہنا تھا کہ حماس نے جو کیا وہ بھی جرم اور قابل مذمت ہے، اسرائیل اور فلسطین میں انتشارکاسلسلہ اب بند ہوجاناچاہیے۔
خیال رہے اسرائیلی فوج کی جانب سے غزہ کے اسپتالوں کو نشانہ بنانے کا سلسلہ جاری ہے، غزہ میں اسرائیلی بربریت کے باعث شہید فلسطینیوں کی تعداد 3900 تک پہنچ گئی ہے، جبکہ 14000 کے لگ بھگ زخمی ہیں اور اسپتالوں میں مریضوں کے لئے سہولتیں ختم ہوچکی ہیں۔
اسرائیلی فوج کی جانب سے رفاح میں گھروں پر بھی بمباری کی گئی ہے، جس کے باعث 33فلسطینی جام شہادت نوش کرگئے ہیں، اسرائیلی طیاروں نے الزیتون کے علاقے میں آرتھو ڈوکس چرچ کو بھی نہ بخشا جہاں بے شمار افراد نے پناہ لی ہوئی تھی۔