پاکستان تحریک انصاف کے وزیر پارلیمانی امور پنجاب راجہ بشارت کا کہنا ہے کہ وزیر اعظم شہباز شریف کا وزیر اعلیٰ پرویز الٰہی کو ڈی نوٹیفائی نہ کرنے کا حکم ہمارے مؤقف کی تائید ہے۔
راجہ بشارت نے اپنے ایک بیان میں کہا کہ وفاقی وزیر داخلہ رانا ثنا اللہ دو دنوں سے سوائے جگتوں کے کچھ نہیں کر رہے تھے، پاکستان کا آئین سب سے مقدم ہے، ہم تمام اقدامات آئین کے دائرہ کار میں رہتے ہوئے کر رہے ہیں۔
وزیر پارلیمانی امور نے مطالبہ کیا کہ وفاق آئینی شقوں پر لفظی گولہ باری کرنے والوں کے خلاف نوٹس لے۔
انہوں نے کہا کہ ملکی مسائل کا واحد فوری منصفانہ انتخابات ہیں، عمران خان اپنی سیاست سے زیادہ ملک بچانے کے لیے اقدامات کر رہے ہیں۔
یہ بھی پڑھیں: عمران خان ہمارے لیڈر ہیں، ان کی آواز پر لبیک کہیں گے، پرویز الٰہی
خیال رہے کہ گورنر پنجاب بلیغ الرحمٰن کی زیرِ صدارت گورنر ہاؤس میں اہم اجلاس ہوا جس میں وزارت قانون اور لیگل ٹیم نے وزیر اعلیٰ پرویز الٰہی کو ڈی نوٹیفائی نہ کرنے کی تجویز دی۔
ذرائع کے مطابق وزیر اعظم شہباز شریف نے گورنر کو وزیر اعلیٰ کو ڈی نوٹیفائی کرنے سے فی الحال روک دیا اور لیگل ٹیم سے مزید مشورہ کرنے کی ہدایات کر دی۔ لیگل ٹیم نے بتایا کہ اعتماد کا ووٹ لینے سے انکار نہیں کیا تو کیسے ڈی نوٹیفائی کر سکتے ہیں۔