اسلام آباد: وزیر صنعت و پیداوار رانا تنویر حسین کا کہنا ہے کہ آنیوالے دنوں میں عوام کو بجلی کے بلوں میں ریلیف ملے گا مگر وقت لگے۔
اے آر وائی نیوز کے مطابق وزیر صنعت و پیداوار رانا تنویر نے میڈیا سے گفتگو کرتے ہوئے کہا کہ حکومت نے بجلی بلوں میں ریلیف کے لیے کمیٹیاں بنائی ہیں، ترقیاتی بجٹ سے 50 ارب روپے کی کٹوتی 200 یونٹ تک ریلیف دینے کے لیے ہے۔
انہوں نے کہا کہ صنعتوں کو بھی 10 روپے فی یونٹ کا ریلیف دیا گیا ہے۔
وفاقی وزیر نے کہا کہ آئی پی پیز کے ساتھ معاہدوں پر بات چیت ہورہی ہے، گیس ودیگر ذرائع سے لنے والے منصوبوں کو کوئلے پر منتقل کرنے کے لیے بات چیت جاری ہے۔
رانا تنویر کا کہنا تھا کہ وزیراعظم نے دورہ چین کے دوران چینی صدر سے اس ضمن میں بات کی تھی، بجلی گھروں کے کوئلے پر منتقل ہونے سے پیداواری لاگت میں کمی آئے گی۔
پی ٹی آئی سے متعلق انہوں نے کہا کہ کابینہ اجلاس میں پی ٹی آئی اور بانی پی ٹی آئی کے حوالے سے غور نہیں ہوا، بانی پی ٹی آئی نے خود اعتراف کیا ہے انہوں نے کارکنوں کو جی ایچ کیو بھیجا۔
رانا تنویر نے کہا کہ بانی پی ٹی آئی نے کہا جی ایچ کیو کے آگے پرامن احتجاج کریں، اعتراف یہی ہوتا ہے کہ میں گھر تک گیا تھا میں نے کچھ نہیں کیا۔
انہوں نے مزید کہا کہ بانی پی ٹی آئی نے جس طرح کارکنوں کی برین واشنگ کی وہ سامنے ہے، بانی پی ٹی آئی نے کہا تھا مجھے گرفتار کیا تو ردعمل ایسا ہوگا دیکھ نہیں سکیں گے۔