بالی ووڈ کے معروف اداکار رنبیر کپور کو کرسمس کے موقع پر کیک کاٹنا مہنگا پڑ گیا، بات توہین مذہب اور مقدمہ درج کروانے تک پہنچ گئی۔
بھارتی میڈیا رپورٹس کے مطابق ممبئی کے گھاٹ کوپر پولیس اسٹیشن میں سنجے تیواری کے دو وکیل آشیش رائے اور پنکج مشرا پیش ہوئے اور اداکار رنبیر کپور سمیت کپور فیملی کے خلاف توہین مذہب کا مقدمہ درج کروانے کی درخواست دائر کی۔
درخواست گزار نے سوشل میڈیا پر وائرل ویڈیو کو جواز بنایا اور کہا کہ کرسمس کے موقع پر کیک کاٹنے سے قبل اس پر نشہ آور مشروب ڈالا اور اسے نظر آتش کرکے ’جے ماتا دی‘ (آگ کے دیوتا کو پکارا) کا نعرہ بلند کیا گیا۔
درخواست گزار کے مطابق اداکار رنبیر کپور اور ان کے اہل خانہ نے جان بوجھ کر غیر ہندو مذہبی تہوار کے موقع پر نشہ آور مشروب کا استعمال کیا اور ہندو مذہب کا نعرہ لگایا ہے جس سے سناتن مذہب کی توہین ہوئی ہے، اس لیے ان کے خلاف قانونی کارروائی کی جائے۔
View this post on Instagram
درخواست گزار کے وکیلوں نے استدعا کی کہ وائرل ویڈیو سے امن و امان کی صورتحال کو خطرہ ہے اس لیے رنبیر کپور اور اہل خانہ کے خلاف دفعہ 295 اے (مذہب یا مذہبی عقائد کی توہین کرکے کسی بھی طبقے کے مذہبی جذبات کو مجروح کرنے کے ارادے سے جان بوجھ کر اور بدنیتی پر مبنی کام) ، دفعہ 298 (مذہبی جذبات کو ٹھیس پہنچانے کے ارادے سے الفاظ وغیرہ کہنا)، دفعہ 500 (ہتک عزت) اور دفعہ 34 (مشترکہ ارادے سے کئی افراد کے ذریعہ کیے گئے کام) کے تحت ایف آئی آر درج کی جائے۔
بھارتی میڈیا کہ مطابق درخواست گزار کی شکایت پر فی الحال ایف آئی آر درج نہیں کی گئی ہے۔