راولپنڈی ٹیسٹ کے تیسرے روز بنگلا دیش نے 5 وکٹوں کے نقصان پر 316 رنز بنالیے۔
راولپنڈی میں کھیلے جارہے پہلا ٹیسٹ کے تیسرے روز کھیل کے اختتام پر بنگلا دیش نے 5 وکٹوں کے نقصان پر 316 رنز بنالیے مہمان ٹیم کو پاکستان کی برتری ختم کرنے کے لیے مزید 132 رنز درکار ہیں۔
وکٹ کیپر بیٹر مشفیق الرحیم 55 اور لٹن داس 52 رنز کے ساتھ کریز پر موجود ہیں۔
شادمان اسلام نروس نائنٹیز کا شکار ہوئے اور 93 رنز بنا کر پویلین لوٹ گئے، مومن الحق 50 رنز بنا کر نمایاں رہے، نجم الحسن شنٹو 16، شکیب الحسن 15 اور ذاکر حسن 12 رنز بناسکے۔
پاکستان کی جانب سے فاسٹ بولر خرم شہزاد نے دو کھلاڑیوں کو آؤٹ کیا، صائم ایوب، محمد علی اور نسیم شاہ نے ایک، ایک وکٹ حاصل کی۔۔
واضح رہے کہ پاکستان نے پہلی اننگز 6 وکٹوں کے نقصان پر 448 رنز بنا کر ڈکلیئر کی تھی۔
سعود شکیل اور محمد رضوان نے شاندار سنچریاں اسکور کی تھیں، بنگلہ دیش کی جانب سے شریف الاسلام اور حسن محمود نے دو، دو وکٹیں حاصل کی تھیں۔