پی ڈی ایم حکومت میں پٹرول، بجلی، گیس کی قیمتوں میں ریکارڈ اضافہ ہوا

پی ڈی ایم کی اتحادی حکومت آج ختم ہو رہی ہے 16 ماہ تک قائم رہنے والی اس حکومت میں پٹرول، بجلی اور گیس کی قیمتوں میں ریکارڈ اضافہ ہوا۔

اے آر وائی نیوز کے مطابق پی ڈی ایم کی اتحادی حکومت آج ختم ہو رہی ہے 16 ماہ تک قائم رہنے والی اس حکومت میں پٹرول، بجلی اور گیس کی قیمتوں میں ریکارڈ اضافہ ہوا صرف بجلی اور گیس کی مد میں صارفین پر 1800 ارب روپے سے زائد کا اضافی بوجھ ڈالا گیا۔

حکومت نے سوا سالہ اقتدار کے دوران پٹرولیم مصنوعات 129 روپے 25 پیسے فی لیٹر تک مہنگی کیں جب کہ بجلی کے بنیادی ٹیرف میں 15 روپے 41 پیسے تک فی یونٹ اضافہ کیا گیا اسی طرح گیس کے نرخوں میں بھی 112 فیصد تک اضافہ کیا گیا جس کے باعث ان کی قیمتوں نے تاریخ کی بلندیوں کو چھو لیا۔

بات کی جائے پٹرولیم مصنوعات کی تو پٹرول کی فی لیٹر قیمت میں 123 روپے 9 پیسے کا اضافہ کیا گیا جب کہ ہائی اسپیڈ ڈیزل 129 روپے 25 پیسے فی لیٹر مہنگا کیا گیا۔

بجلی صارفین نے اس حکومت کی پوری مدت کے دوران بجلی کے بھاری بلوں کے ساتھ سہ ماہی اور ماہانہ ایڈجسٹمنٹ کا بوجھ الگ برداشت کیا۔ صارفین پر ڈیڑھ ہزار ارب روپے سے زائد کا اضافی بوجھ ڈالا گیا حکومت ختم ہونے سے چند روز قبل بجلی کے بنیادی ٹیرف میں ساڑھے 7 روپے فی یونٹ تک اضافہ کیا گیا۔

گزشتہ سال بجلی صارفین پر 3.39 روپے فی یونٹ اضافی سر چارج الگ عائد کیا گیا تھا۔ گیس صارفین پر 310 ارب سے زائد کا اضافی بوجھ ڈالا گیا۔