روایتی لباس پہننے پر خاتون کو ریسٹورنٹ میں داخلے سے روک دیا گیا

بھارت میں ریسٹورنٹ منیجر نے روایتی لباس پہننے پر خاتون کو داخلے سے روک دیا جس کی ویڈیو سوشل میڈیا پر وائرل ہوگئی۔

سماجی رابطے کی ویب سائٹ ایکس پر ایک ویڈیو وائرل ہورہی ہے جس میں جوڑے نے الزام عائد کیا کہ  ریسٹورنٹ میں کھانا کھانے کیلئے آئے تھے، اس کی بیوی شلوار قمیض میں ملبوس تھی، انہیں اندر جانے نہیں دیا۔

جوڑے نے کہا کہ منیجر نے ہمارے ساتھ بدسلوکی کی جبکہ دیگر کسٹمرز جو پینٹ شرٹ میں ملبوس تھے انہیں اندر جانے دیا گیا۔

یہ پڑھیں: کراچی میں شلوار قمیض پہنے شہری کو ریسٹورنٹ سے نکال دیا گیا

دوسری جانب ریسٹورنٹ کے مالک نے الزامات کی تردید کرتے ہوئے کہا کہ جوڑے نے ٹیبل بک نہیں کی تھی، اسی لیے انہیں داخلہ نہیں دیا گیا۔

ان کا کہنا تھا کہ ریسٹورنٹ کی کوئی ڈریس کوڈ پالیسی نہیں ہے یہاں پر تمام گاہکوں کو خوش آمدید کہا جاتا ہے۔

بعد ازاں بھارتی وزیر کپل مشرا نے  میڈیا کو بتایا کہ ریسٹورنٹ انتظامیہ نے آئندہ لباس کی بنیاد پر کسی پر پابندی نہ لگانے کا وعدہ کیا ہے اور رکشا بندھن کے موقع پر بھارتی لباس پہن کر آنے والی خواتین کو خصوصی رعایت دینے کا اعلان کیا ہے۔