لاہور کے قومی اسمبلی کے حلقہ این اے 121 میں ٹکٹ کے معاملے پر مسلم لیگ (ن) کے رہنما روحیل اصغر قیادت کے سامنے ڈٹ گئے۔
این اے 121 میں ٹکٹ کی تقسیم پر (ن) لیگ کے پارلیمانی بورڈ اجلاس کا احوال سامنے آگیا۔ ذرائع نے بتایا کہ اجلاس میں روحیل اصغر نے قیادت سے کہا کہ یہ آبائی حلقہ ہے یہاں سے ہی الیکشن لڑوں گا، آزاد حیثیت سے بھی الیکشن لڑنا پڑا تو لڑوں گا۔
روحیل اصغر نے کہا کہ میرے آباؤ اجداد بھی اسی حلقے سے انتخابات لڑتے رہے، 2018 میں میرے حلقے کا کچھ حصہ ایاز صادق کے حلقے میں شامل ہوا، 2018 میں کارکنوں کے ساتھ خود ایاز صادق کی مہم چلائی تھی، مشکل سے اصل حلقہ واپس ملا تو آبائی نشست سے الیکشن کیوں نہ لڑوں؟ کسی اور حلقے سے کاغذات جمع نہیں کروائے اسی حلقے سے لڑوں گا۔
اجلاس میں ایاز صادق نے پرانے اور نئے حلقے کے اعداد و شمار پارلیمانی بورڈ کے سامنے پیش کیے اور کہا کہ پرانے حلقہ کا کم و بیش 56 فیصد حصہ این اے 121 میں شامل ہو چکا ہے، میں پارٹی ڈسپلن کا پابند ہوں لہٰذا ٹکٹ پر قیادت کا ہر فیصلہ منظور ہوگا۔
اس پر روحیل اصغر اپنا مؤقف بیان کرنے کے بعد اجلاس چھوڑ کر چلے گئے۔ پارلیمانی بورڈ نے کہا کہ این اے 121 میں ٹکٹ کا حتمی فیصلہ نواز شریف خود کریں۔