روس نے 2 یورپی ممالک سوئیڈن اور فن لینڈ کو کسی بھی اشتعال انگیز اقدام کے خلاف بھرپور جوابی اقدامات کی دھمکی دے دی ہے۔
روسی وزارت خارجہ کے نائب ترجمان الیکسی زیتسیف نے خبردار کیا ہے کہ ماسکو کسی بھی اشتعال انگیزی کے بھرپور خلاف جوابی کارروائی کرے گا جو نیٹو سویڈن یا فن لینڈ میں داخلے کے بعد کر سکتا ہے۔
غیر ملکی میڈیا کے مطابق روسی وزارت خارجہ کے نائب ترجمان الیکسی زیتسیف نے نیوز کانفرنس میں کہا کہ نیٹو میں شمولیت کے لیے تیار ہوتے وقت ہیلسنکی اور اسٹاک ہوم کو اس بات کا احساس ہونا چاہیے کہ اس کے کیا نتائج برآمد ہو سکتے ہیں جب کہ سوئیڈن اور فن لینڈ کی نارتھ اٹلانٹک ٹریٹی آرگنائزیشن (نیٹو) میں شمولیت یورپ میں سیاسی اور فوجی کشیدگی میں اضافے کے قریب ایک قدم ہوگا جو بالٹک اور آرکٹک کے علاقوں کے لیے حالات کو مزید خراب کر دے گا۔
زیتسیف نے واضح طور پر کہا کہ پرامن تعاون کے کافی کم امکانات ہیں جس کی نارڈک خطے میں بہت زیادہ ضرورت ہے۔ انہوں نے کہا کہ ہیلسنکی اور اسٹاک ہوم کے لیے نیٹو اور برسلز کی ہدایات پر عمل کرنا یا واشنگٹن کی ہدایات پرعمل کرنا ضروری ہوگا۔