ممبئی: آئی سی سی مینز ٹی ٹوئنٹی ورلڈ کپ کا میلہ آسٹریلیا میں جاری ہے، مشہور اسپورٹس شخصیات اپنی فیورٹ ٹیم کے حوالے سے پیش گوئیاں کر رہے ہیں۔
تفصیلات کے مطابق بھارتی لیجنڈری کرکٹر سچن ٹنڈولکر نے ٹی ٹوئنٹی ورلڈ کپ کا سیمی فائنل کھیلنے والی ٹیموں کے حوالے سے پیش گوئی کی ہے۔
برطانوی اخبار سے گفتگو کرتے ہوئے سچن ٹنڈولکر نے پیش گوئی کی کہ آئی سی سی ٹی ٹوئنٹی ورلڈ کپ کے سیمی فائنل میں پاکستان، بھارت، آسٹریلیا اور انگلینڈ کی ٹیمیں پہنچیں گی۔
برطانوی اخبار کے نمائندے نے ان سے سوال کیا کہ ورلڈ کپ کون جیتے گا؟ جواب میں لیجنڈری کرکٹر نے کہا کہ میرا دل بھارت کی طرف ہے۔
اس سے قبل سوئنگ کے سلطان اور پاکستان کرکٹ ٹیم کے سابق کپتان وسیم اکرم نے بھی ٹی ٹوئنٹی ورلڈ کپ کا سیمی فائنل کھیلنے والی ٹیموں کے حوالے سے پیش گوئی کی تھی۔
وسیم اکرم نے سیمی فائنل کے لیے آسٹریلیا ، بھارت ، پاکستان اور جنوبی افریقا کو فیورٹ ٹیمیں قرار دیا تھا۔
واضح رہے کہ ٹی ٹوئنٹی ورلڈ کپ کے پہلے مرحلے میں کوالیفائنگ میچز کھیلے جائیں گے، ٹورنامنٹ کے لیے کُل 8 ٹیموں کو دو گروپس میں تقسیم کیا گیا ہے۔
پہلے مرحلے کے اختتام پر چار ٹیمیں سپر 12 کے لیے کوالیفائی کریں گی، سپر 12 راؤنڈ کا آغاز 22 اکتوبر سے ہوگا۔