قومی ٹیم کے مڈل آرڈر بیٹر سعود شکیل کا کہنا ہے کہ جنوبی افریقہ کے خلاف شکست کو بھلا کر اگلے میچز پر فوکس کریں گے۔
گزشتہ روز چنئی میں کھیلے گئے ورلڈ کپ کے 26ویں میچ میں جنوبی افریقہ نے پاکستان کو سنسنی خیز مقابلے کے بعد ایک وکٹ سے شکست دی، جنوبی افریقہ نے پاکستان کی جانب سے دیا جانے والا 271 رنز کا ہدف 9 وکٹوں کے نقصان پر حاصل کرلیا۔
تاہم پاکستان کے مڈل آرڈر بیٹر سعود شکیل نے میڈیا سے گفتگو کرتے ہوئے کہا کہ ہم اگر مگر کنڈیشن میں اچھا کھیل جاتے ہیں ایسی صورتحال میں ٹورنامنٹ کا مزہ رہتا ہے، کل کا میچ جیت جاتے تو دو قیمتی پوائنٹس ملتے۔
سعود شکیل نے کہا کہ شکست پر ڈریسنگ روم میں کافی مایوسی ہے، پچھلے میچز میں بریک تھرو نہیں مل رہے تھے، آج ملے تو پھڑک بھی نظر آئی، پچ میں اتنا کچھ تھا نہیں مگر بولرز نے زبردست کم بیک کیا۔
سعود شکیل نے کہا کہ امپائرز کال والے فیصلے کبھی حق میں ہوتے ہیں کبھی خلاف، دل ٹوٹا مگر کڑوا گھونٹ پی لیا۔ چنئی کے کراوڈ نے کسی ایک ٹیم کو نہیں، اچھی کرکٹ کو سپورٹ کیا۔
انہوں نے مزید کہا کہ پہلے بیٹنگ کرتے ہیں تو اوپنرز ٹائم لیتے ہیں، ہم پے در پے وکٹ کھو دیتے ہیں جس کی وجہ سے اسٹرائیک ریٹ متاثر ہوتا۔
سعود شکیل کا کہنا تھا کہ کوشش ہوتی ہے کہ جتنا لمبا کھیل سکیں کھیلیں، شاداب کے ساتھ اننگز بنانے کی کوشش کی، غلطی ہوئی کہ پوری بالز نہ کھیل سکے، میں یا نواز آخر تک کھیلتے تو پوری بالز کھیل کر 20 ، 25 رنز کا فرق ڈال سکتے تھے۔
واضح رہے کہ ورلڈ کپ میں پاکستان نے 6 میچز کھیلے ہیں چار میں شکست اور دو میں کامیابی حاصل ہوئی، قومی ٹیم اپنا اگلا میچ 31 اکتوبر کو بنگلہ دیش کے خلاف کھیلے گی۔