ریاض : سعودی عرب کی وزارت تجارت اور وزارت بلدیات نے مملکت میں ناجائز منافع خوری اور قوانین کی خلاف ورزی کرنے والوں کو سختی سے متنبہ کردیا ہے۔
سعودی ذرائع ابلاغ کی رپورٹ کے مطابق وزارت بلدیات و دیہی و آباد کاری امور بھی وزارت تجارت کے ساتھ قیمتوں پر کنٹرول کےلیے کارروائی کرے گی اور خلاف ورزیوں کا فوری نوٹس لیا جائے گا۔
اخبار 24 کے مطابق وزارت بلدیات و دیہی و آباد کاری امور نے بلدیاتی خلاف ورزیوں پر سزاؤں کا چارٹ جاری کیا ہے۔
وزارت تجارت کی طرف سے مقرر کردہ اشیاء کی قیمت سے زیادہ سامان مہنگا فروخت کرنے کی صورت میں پانچ ہزار ریال سے ایک لاکھ ریال تک کا جرمانہ ہوگا۔
اس کے علاوہ اشیاء کی موجودگی کے باجود اسے فروخت کرنے سے انکار پر دو سو سے ایک ہزار ریال تک جرمانہ مقرر کیا گیا ہے۔
سامان کی خریداری پر بل دینے سے انکار کرنا بھی خلاف ورزی میں شامل ہے۔ اس پر ایک ہزار سے دو سو ریال تک جرمانہ ہوگا۔
متعلقہ وزارت نے سامان پر قیمت کا اسٹیکر نہ لگانے کو بھی خلاف ورزیوں کی فہرست میں شامل کیا ہے، اس پر بھی زمرہ بندی کے تحت جرمانہ ہوگا۔