ریاض : سعودی عرب نے سویڈش سفیرکو طلب کرکے واقعے کی شدید مذمت کرتے ہوئے قرآن پاک کی بے حرمتی کی گھناؤنی حرکت کو سنگین جرم قرار دیا اور ملعون شخص کے خلاف کارروائی کا مطالبہ کردیا۔
تفصیلات کے مطابق سعودی عرب کے دارلحکومت ریاض میں سوئیڈن کے سفیر کو وزارت خارجہ طلب کیا گیا اور سوئیڈن واقعے پر احتجاج ریکارڈ کرایا۔
سعودی عرب نے اسٹاک ہوم میں انتہا پسند جنونی شخص کی جانب سے قرآن پاک کی بےحرمتی کو سنگین جرم قراردیتےہوئے ملعون شخص کیخلاف کارروائی کا مطالبہ کردیا۔
سعودی وزارتِ خارجہ سے جاری بیان میں کہا گیا ہےکہ قرآن پاک کو نذرآتش کرنے کا گھناؤنا فعل ناقابل قبول اور گھٹیا حرکت ہے۔
دوسری جانب جدہ میں اوآئی سی کے غیرمعمولی اجلاس کے بعد جاری بیان میں سیکریٹری جنرل حسین ابراہیم طہٰ نےقرآن پاک کی بےحرمتی کو گھناؤناجرم قرار دیتے ہوئے کہا کہ امتِ مسلمہ کوتکلیف پہنچی۔
سیکریٹری جنرل نے رکن ملکوں کو اسلاموفوبیا کیخلاف مشترکہ لائحہ عمل اختیارکرنےاورمستقبل میں ایسے واقعات کےتدارک کیلئےاجتماعی اقدامات کی ضرورت پر زور دیتے ہوئے کہا بین الاقوامی قوانین کےذریعےمذہبی منافرت کو روکنا چاہیے۔
اوآئی سی جنرل سیکریٹری نے واضح کیا قرآن پاک کےنسخوں کی بے حرمتی اور ہمارے پیارےنبی حضرت محمد ﷺ کی شان میں گستاخی کرنا محض اسلامو فوبیا کے معمولی واقعات نہیں ہیں، اقوام متحدہ کےچارٹر کے تحت ریاستیں، نسل، جنس اور زبان اس بات کی پابند ہیں کہ مذہب اور انسانی حقوق کا احترام کیا جائے