سعودی عرب میں ایک قدیم شہر کے آثار دریافت ہوئے ہیں بڑے رقبے پر پھیلے ان آثار میں آبپاشی کا نظام بھی موجود ہیں۔
غیر ملکی میڈیا کے مطابق سعودی آثار قدیمہ اتھارٹی کا کہنا ہے کہ مملکت کے جنوبی ریجن عسیر کی جرش کمشنری میں بڑے رقبے پر پھیلے ہوئے آثار قدیمہ دریافت ہوئے ہیں۔
رپورٹ کے مطابق حالیہ دریافت ہونے والے آثار رہائشی کمپاؤنڈز کی شکل میں ہیں، ان مکانوں کی دیواروں کو پتھروں اور گارے سے بنایا گیا تھا اور یہ آثار گزشتہ مہم کے دوران سائٹ کے شمال میں دریافت ہونے والے آثار کا تسلسل ہے۔
اس حوالے سے سائٹ پر کام کرنے والی ٹیم کا کہنا ہے کہ دریافت ہونے والے آثار میں اس دور کا آب پاشی کا قدیم نظام بھی موجود ہے۔ دریافت ہونے والے آثار میں شہری آبادی کو آبی فراہمی کے لیے ایک کنواں بھی بنایا گیا تھا جس سے کئی آبی گزرگاہوں کو منسلک کیا گیا، جس سے یہ معلوم ہوتا ہے کہ اس زمانے میں پانی کو رہائشی علاقے تک پہنچایا جاتا تھا۔
ان آثار کے ساتھ گرینائٹ کا پتھر بھی دریافت ہوا ہے جس پر تین سطری اسلامی نقش نگاری کی ہوئی تھی۔ سائٹ پر بڑی تعداد میں روزمرہ کے استعمال کی قدیم اشیا بھی دریافت ہوئی ہیں جن میں مٹی کے برتن اور صراحیاں بھی شامل ہیں۔