برطانیہ میں سعودی طالبعلم چاقو کے وار سے قتل

برطانیہ کے شہر کیمبرج کے جنوب میں واقع مل پارک میں ایک دل سوز واقعہ رونما ہوا، ایک سعودی طالبعلم کو چاقو کے وار کرکے موت کے گھاٹ اتار دیا گیا۔

بین الاقوامی خبر رساں ادارے کی رپورٹ کے مطابق برطانوی پولیس نے واقعے میں ملوث ہونے کے شبے میں دو افراد کو حراست میں لے لیا ہے، جن سے تحقیقات شروع کردی گئی ہیں۔

کیمبرج شائر پولیس کے مطابق 21 سالہ شخص کو قتل کے شبے جبکہ 50 سالہ شخص کو مجرم کی مدد کرنے کے شبے میں گرفتار کرلیا گیا ہے، دونوں تھورپ ووڈ پولیس اسٹیشن میں ہیں۔

کیمبرج پولیس کو گزشتہ جمعے کی رات 11 بجکر 27 منٹ پرتشدد کی اطلاع کے بعد بلایا گیا ایک 20 سالہ نوجوان زخمی حالت میں پایا گیا، اسے سنیچر کی صبح مردہ قرار دے دیا گیا۔

برطانوی حکام نے باضابطہ طور پر مقتول کی شناخت ظاہر نہیں کی تاہم اتوار کو الاخباریہ اور العربیہ کی رپورٹ میں یہ انکشاف ہوا ہے کہ محمد القاسم سعودی شہری اور ای ایف انٹرنیشنل لینگویج کیمپس کا طالبعلم تھا جو ایک نجی اسکول ہے۔

سعودی عرب: غیرملکی ڈاکٹر اور اہلیہ گاڑی میں دم گھٹنے سے ہلاک

اسکول انتظامیہ نے سعودی طالبعلم کی موت پر گہرے دکھ کا اظہار کیا اور کہا کہ’ہم پولیس کے ساتھ مل کر کام کررہے ہیں جو اس واقعہ کی تحقیقات میں مصروف ہے۔

’ہم اس المناک واقعہ سے متاثرہ تمام طلبا اور عملے کو مدد فراہم کر رہے ہیں، ہم نے کونسلنگ سیشن کا اہتمام کیا ہے۔ تمام طلبا کی سیفٹی اور سلامتی ہماری اولین ترجیح ہے۔‘