اسپیکر قومی اسمبلی سردار ایاز صادق نے قومی اسمبلی سیکریٹریٹ کی تنظیم نو کا فیصلہ کیا ہے جس سے قومی خزانے کو سالانہ ایک ارب روپے کی بچت ہوگی۔
اے آر وائی نیوز کے مطابق اسپیکر قومی اسمبلی ایاز صادق کی زیر صدارت فنانس کمیٹی کے اجلاس میں قومی اسمبلی سیکریٹریٹ کی تنظیم نو کے فیصلے کی منظوری دی گئی۔ اس منصوبے سے ملکی خزانے کو سالانہ ایک ارب روپے کی بچت ہو گی۔
قومی اسمبلی سیکریٹریٹ کی تنظیم نو کے اقدامات اس کو ضورت کے مطابق فعال بنانے کا حصہ ہیں۔ اس منصوبے کے پہلے مرحلے میں 90، دوسرے مرحلے میں 130 آسامیاں ختم کی جائیں گی جس سے 56 کروڑ روپے سالانہ بچت ہو گی۔
تیسرے مرحلے میں انتظامی اصلاحات کے اقدامات سے مزید 40 کروڑ روپے سالانہ کی بچت ہو گی۔
اس فیصلے کے تحت قومی اسمبلی سیکریٹریٹ کی گریڈ ایک سے 19 تک کی 220 غیر ضروری آسامیاں ختم کر دی گئیں۔
دریں اثنا اجلاس میں قومی اسمبلی سیکریٹریٹ کی ڈیجیٹلائزیشن کا عمل شروع کرنے کا بھی فیصلہ کیا گیا اور اسپیکر نے پارلیمنٹ لاجز کے اضافی بلاکس کی بر وقت تعمیر کے ساتھ اقدامات یقینی بنانے کی ہدایت کی۔