میاں بیوی میں ہم آہنگی اور خوشی نہ ہو تو اسلام علیحدگی کی اجازت دیتا ہے، سپریم کورٹ

اسلام آباد : سپریم کورٹ نے شادی اور پھر خلع لینے کے کیس کے فیصلے میں کہا کہ اسلام عورت کو خلع کا حق دیتا ہے، میاں بیوی میں ہم آہنگی اور خوشی نہ ہو تو اسلام علیحدگی کی اجازت دیتاہے۔

تفصیلات کے مطابق امریکا میں شادی اور پھر خلع لینے کے کیس میں سپریم کورٹ نے تحریری حکم نامہ جاری کردیا۔

جسٹس حسن اظہر رضوی نے 7صفحات پرمشتمل فیصلہ تحریر کیا، جس میں سپریم کورٹ نے خلع کیخلاف پاکستانی شہری کی اپیل خارج کردی۔

سپریم کورٹ نے کہا کہ ثمرینا رشیدامریکاکیساتھ پاکستانی شہریت بھی رکھتی ہیں، درخواست گزار نےامریکامیں نکاح کی پاکستان میں منسوخی چیلنج کی۔

فیصلے میں کہا گیا کہ اسلام عورت کو خلع کا حق دیتا ہے،میاں بیوی میں ہم آہنگی اور خوشی نہ ہو تو اسلام علیحدگی کی اجازت دیتاہے، خلع کےباوجودغیر ضروری طور پرسابق اہلیہ کو قانونی چارہ جوئی میں گھسیٹاگیا۔

عدالت کا کہنا تھا کہ ریکارڈ کےمطابق خلع کےبعدخاتون نے امریکامیں دوسری شادی کرلی،درخواست گزار نے بھی پاکستان میں دوسری شادی کرنے کی کوشش کی،سندھ ہائی کورٹ کا فیصلہ قانون کے مطابق ہے۔

درخواست گزار سہیل احمد نے سندھ ہائیکورٹ کا فیصلہ سپریم کورٹ میں چیلنج کیا تھا۔