اسلام آباد: سپریم کورٹ نے سابق ڈپٹی اسپیکر قاسم سوری کی طلبی کے اشتہار جاری کرنے کا حکم دے دیا۔
تفصیلات کے مطابق سپریم کورٹ میں ڈی سیٹ کرنےکیخلاف قاسم سوری کی اپیل پر سماعت ہوئی۔
قاسم سوری سپریم کورٹ کی طلبی پر ایک مرتبہ پھر پیش نہ ہوئے ، جس پر سپریم کورٹ نے سابق ڈپٹی اسپیکر کی طلبی کے اشتہار جاری کرنے کا حکم دے دیا۔
عدالت نے طلبی کا نوٹس قاسم سوری کے گھر کے باہر چسپاں کرنے کا حکم دیا۔
عدالت نے ریمارکس دیے کہ ریکارڈ کےمطابق قاسم سوری کے بھائی نے نوٹس وصولی سے انکار کیا، وہ جان بوجھ کر سپریم کورٹ میں پیش نہیں ہو رہے، سابق ڈپٹی اسپیکر کی جانب سے نوٹس وصولی سے اجتناب بدقسمتی ہے۔
چیف جسٹس قاضی فائزعیسیٰ نے وکیل نعیم بخاری سے مکالمے میں استفسار کیا کیا کہ آپ کے موکل میڈیا اور سوشل میڈیا پربہت متحرک ہیں تو نعیم بخاری نے بتایا پتا نہیں جناب میں تو ٹی وی نہیں دیکھتا۔
جس پر چیف جسٹس نے کہا آپ خود ٹی وی کی شخصیت ہیں اور ٹیلی وژن نہیں دیکھتے، کیا آپ ایکس یا ٹویٹر سے واقف ہیں؟
وکیل نعیم بخاری کا کہنا تھا سوشل میڈیا استعمال نہیں کرتا نہ ہی مجھےاستعمال کرنا آتا ہے،
چیف جسٹس نے کہا آپ خود کو بوڑھا کیوں سمجھ رہے ہیں جوان اور اپ ٹو ڈیٹ رہیں۔
جسٹس عرفان سعادت نے ریمارکس دیئے کہ ایک ٹی وی پروگرام میں آپ نے کہا تھا میرے دوست بوڑھا نہیں ہونے دیتے تو نعیم بخاری نے عدالت کو بتایا کہ قاسم سوری سے کوئی رابطہ نہیں ہے۔
چیف جسٹس نے کہا آئندہ سماعت جولائی میں رکھیں گے اور عدالتی حکم میں تاریخ مقرر کر دیں گے۔
بعد ازاں سپریم کورٹ نے سماعت آئندہ ماہ تک ملتوی کر دی۔