ابو ظہبی: متحدہ عرب امارات میں سرکاری اور نجی اسکولوں کے درمیان طلبہ کے ٹرانسفر کا طریقہ کار مقرر کردیا گیا، اس حوالے سے ہدایات جاری کردی گئی ہیں۔
اردو نیوز کے مطابق متحدہ عرب امارات کے تعلیمی ادارے نے سرکاری اور نجی اسکولوں کے درمیان طلبہ کے ٹرانسفر کا طریقہ کار مقرر کردیا۔
تعلیمی ادارے کی جانب سے جاری گائیڈ بک میں بتایا گیا ہے کہ سرکاری اسکولوں کے طلبہ تعلیمی سال کے پہلے اور دوسرے ہفتے کے دوران ایک اسکول سے دوسرے اسکول میں ٹرانسفر ہوسکتے ہیں۔
تعلیمی ادارے کا کہنا ہے کہ دوسرے سیشن کے آغاز کے پہلے ہفتے میں نجی اسکولوں کے طلبہ سرکاری اسکولوں میں ٹرانسفر کروا سکتے ہیں۔
مذکورہ سہولت ان اسکولوں کے لیے دی گئی ہے جن میں سرکاری اسکولوں والا کورس پڑھایا جارہا ہے، ٹرانسفر کی سہولت پہلے اور دوسرے ہفتے میں ہوگی۔
گائیڈ بک میں مزید بتایا گیا ہے کہ ایسے پرائیویٹ اسکول سے جہاں غیر ملکی نصاب تعلیم رائج ہو وہاں کے طلبہ کا سرکاری اسکول میں ٹرانسفر تعلیمی سال کے آغاز میں یا زیادہ سے زیادہ پہلے اور دوسرے ہفتے کے دوران ممکن ہوگا۔