بھارت میں ڈاکٹروں نے خاتون کے پیٹ میں پانچ سال قبل آپریشن کے دوران غلطی سے رہ جانے والی قینچی کامیاب آپریشن کے بعد نکال لی۔
ریاست کیرلا سے تعلق رکھنے والی ہرشینا کے پیٹ سے 11 سینٹی میٹر لمبی قینچی نکالی گئی۔ 2017 میں آپریشن کے دوران ڈاکٹروں نے غلطی سے قینچی ہرشینا کے پیٹ میں چھوڑ دی تھی۔
ڈیلیوری کے بعد خاتون کو اکثر پیٹ میں درد اُٹھتا تھا۔ انہوں نے یوں ہی پانچ سال گزار دیے اور جب درد کی شدت زیادہ بڑھی تو ڈاکٹر سے رجوع کیا۔ اسکیننگ کے دوران انکشاف ہوا کہ ان کے پیٹ میں قینچی موجود ہے۔
مزید پڑھیں: نوجوان نے اسٹیل کے 63 چمچے نگل لیے
ہرشینا کے مطابق: ’30 نومبر 2017 کو ڈیلیوری کے لیے میرا آپریشن ہوا تھا اور اس کے بعد پیٹ میں درد رہتا تھا۔ متعدد مشورے اور چیک اپ کے باوجود درد میں کمی نہیں آئی۔ جب درد ناقابلِ برداشت ہوا تو میں اسپتال پہنچی جہاں سی ٹی اسکین سے معلوم ہوا کہ پیٹ میں کوئی تیز دھار چیز ہے۔ بعد میں ڈاکٹروں نے بتایا کہ یہ قینچی ہے‘۔
خاتون نے کیرلا کے وزیر اعلیٰ اور وزیر صحت سے لاپرواہی برتنے والے ڈاکٹروں کے خلاف کارروائی کا مطالبہ کیا۔ وزیر صحت نے محکمہ صحت کے ایڈیشنل چیف سکریٹری سے تحقیقات اور رپورٹ طلب کرتے ہوئے ذمہ داران کے خلاف سخت کارروائی کی ہدایت کر دی۔