سینیٹ الیکشن: خیبر پختونخوا سے منتخب آزاد سینیٹرز پی ٹی آئی میں شامل ہوگئے

اسلام آباد (26 جولائی 2025): سینیٹ الیکشن میں خیبر پختونخوا سے منتخب 5 آزاد سینیٹرز نے باقاعدہ پاکستان تحریک انصاف (پی ٹی آئی) میں شمولیت اختیار کر لی۔

متخب آزاد سینیٹرز نے ڈکلیئریشن چیئرمین پی ٹی آئی بیرسٹر گوہر کو جمع کروائے۔ شمولیت اختیار کرنے والوں میں مرزا آفریدی، اعظم سواتی، فیصل جاوید، نور الحق قادری اور روبینہ ناز شامل ہیں۔

چیئرمین پی ٹی آئی بیرسٹر گوہر نے ڈکلیئریشن الیکشن کمیشن میں جمع کروا دیے۔

یہ بھی پڑھیں: سینیٹ الیکشن میں نشان لگے بیلٹ پیپر دینے کی خبروں کی حقیقت

واضح رہے کہ سینیٹ الیکشن میں مجموعی طور پر 143 ووٹ کاسٹ ہوئے۔ خواتین کی نشست پر پی ٹی آئی کی روبینہ ناز نے 89 ووٹ حاصل کیے، پیپلز پارٹی کی روبینہ خالد نے 52 ووٹ حاصل کیے، خواتین کی نشست پر عائشہ بانو اور ماہ وش علی خان کوئی ووٹ حاصل نہ کر سکیں۔

جنرل نشست پر پی ٹی آئی کے مراد سعید 26، فیصل جاوید 22 ووٹ لے کر کامیاب قرار پائے، جنرل نشست پر مرزا آفریدی 21 اور نور الحق قادری 21 ووٹ لے کر کامیاب ہوئے۔

جنرل نشست پر جے یو آئی کے عطا الحق درویش 18، ن لیگ کے نیاز احمد 18 ووٹ لیکر کامیاب ہوئے، جنرل نشست پر پیپلزپارٹی کے طلحہٰ محمود 17 ووٹ لے کر کامیاب قرار پائے۔

جنرل نشست پر آصف رفیق، اظہر قاضی مشوانی، خرم ذیشان، دلاور خان ووٹ نہ لے سکے، شفقت ایاز، عرفان سلیم، فیض الرحمان، وقاص اوکرزئی ووٹ نہ لے سکے۔

ٹیکنوکریٹ نشست پر اعظم سواتی 89 اور جے یو آئی کے دلاور خان 54 ووٹ لے کر کامیاب قرار پائے، خالد مسعود، ارشاد حسین، نور الحق قادری، وقار احمد قاضی کوئی ووٹ حاصل نہ کر سکے۔