کراچی: ایم کیو ایم پاکستان کے کئی رہنماؤں میں سینیٹ میں فیصل واوڈا کو سپورٹ کرنے کی مخالفت کردی۔
اے آر وائی نیوز کے مطابق ذرائع کا کہنا ہے کہ سینیٹ انتخابات کے لیے امیدواروں کو ٹکٹ دینے کے معاملے پر ایم کیو ایم کی جانب سے اب تک حتمی فیصلہ نہیں کیا جاسکا ہے۔
تاہم ذرائع کا کہنا ہے کہ ایم کیو ایم کے کئی رہنماؤں نے فیصل واوڈا کو سینیٹ میں سپورٹ کرنے کی مخالفت کی ہے۔
ایم کیو ایم رہنماؤں نے پارٹی امیدواروں کو ہی سینیٹ کا ٹکٹ دینے پر اصرار کیا ہے، عامر چشتی، شہباز ظہیر ودیگر کے ناموں پر غور کیا جارہا ہے۔
ذرائع کا بتانا ہے کہ امیدواروں کے ناموں کو حتمی شکل مرکزی ایڈہاک کمیٹی کے اجلاس میں دی جائے گی۔
واضح رہے کہ الیکشن کمیشن آف پاکستان نے 14 مارچ کو سینیٹ کی 48 نشستوں پر انتخابات کا شیڈول جاری کیا ہے۔
شیڈول کے مطابق پولنگ 2 اپریل کو صبح 9 سے شام 4 بجے تک ہوگی۔