بانی پی ٹی آئی اپنے اصولی مؤقف سے پیچھے نہیں ہٹیں گے، شبلی فراز

پی ٹی آئی رہنما شبلی فراز کا کہنا ہے کہ بانی پی ٹی آئی اپنے اصولی موقف سے پیچھے نہیں ہٹیں گے۔

اے آر وائی نیوز کے مطابق پی ٹی آئی رہنما و سینیٹر شبلی فراز نے صحافیوں سے غیر رسمی گفتگو کرتے ہوئے کہا کہ مذاکرات آئین اور قانون کے مطابق ہوں گے ، بانی پی ٹی آئی اپنے اصولی موقف سے پیچھے نہیں ہٹیں گے، سیاسی جماعتیں اور فریقین طے کریں کن بنیادوں پر مذاکرات کرنے ہیں۔

انہوں نے کہا کہ پی ٹی آئی سیاسی جماعت ہے، فیصلے سیاسی قیادت کو کرنا ہی بہتر ہوگا، بانی پی ٹی آئی نے کبھی نہیں کہا کہ چیف جسٹس استعفیٰ دیں۔

شبلی فراز کا کہنا تھا کہ مسلم لیگ ن کے پاس اب کوئی سیاسی بیانیہ نہیں ہے، کچھ لوگ ہیں جو معاملات کو خراب کررہے ہیں، وکلا نے بڑی مدد کی لیکن فیصلہ سازی میں کبھی حائل نہیں ہوئے۔

پی ٹی آئی رہنما نے کہا کہ ن لیگ نے چال کھیلی کہ شیر افضل مروت ہمیں قبول نہیں اسی لیے بانی پی ٹی آئی نے حامد رضا کا نام بھی دیا تھا جب نام سامنے آیا تو پتا چلا کہ شیر افضل کے نام پر ہی مان گئے ہیں۔

سینیٹر شبلی فراز نے کہا کہ نام کے حوالے سے اسپیکر آفس نے کنفیوژن پیدا کی، چیئرمین پی اے سی پنجاب کا حق ہے ایک دو روز میں حتمی فیصلہ ہوجائے گا۔