شاہ محمود قریشی نے اپنی گرفتاری کی تردید کر دی

پاکستان تحریک انصاف کے وائس چیئرمین شاہ محمود قریشی نے اپنی گرفتاری کی تردید کرتے ہوئے کہا ہے کہ مجھے ابھی تک گرفتار نہیں کیا گیا۔

سابق وزیر خارجہ شاہ محمود قریشی نے اپنے ایک بیان میں بتایا کہ غلط معلومات، افراتفری اور دہشت پھیلانے کی حکمت عملی اپنائی جا رہی ہے، خبردار کرتا ہوں کہ یہ ایک بہت بڑی غلطی ہے، پاکستانی عوام مزید گھروں میں نہیں بیٹھیں گے ہمیں کوئی ڈر نہیں۔

اس سے قبل خبر آئی تھی کہ شاہ محمود قریشی کو نقص امن کے پیش نظر اسلام آباد سے پولیس نے گرفتار کیا تاہم اب وہ اس کی تردید کر چکے ہیں۔

دوسری جانب پی ٹی آئی قیادت کا اہم اجلاس طلب کیا گیا ہے جس کی صدارت شاہ محمود قریشی کریں گے۔ اجلاس سے قبل انہوں نے ایک ویڈیو پیغام جاری کیا جس میں ان کا کہنا تھا کہ آج عمران خان کو عدالت میں پیش کر کے 8 روزہ جسمانی ریمانڈ حاصل کیا گیا، اب ان کو 17 تاریخ کو دوبارہ عدالت میں پیش کیا جائے گا۔

انہوں نے بتایا کہ عمران خان خیریت سے ہیں اور پہلے سے زیادہ پُرعزم ہیں، وہ کارکنان کی شہادتوں پر رنجیدہ ہیں، پاکستان کے طول و عرض میں شہادتوں پر ان کو سخت تکلیف ہوئی، پی ٹی آئی ہمیشہ پرامن رہی ہے، ہماری جدوجہد ہمیشہ آئین و قانون کے دائرے میں رہی ہے۔

شاہ محمود قریشی نے کہا کہ عمران خان کا کارکنوں کیلیے واضح پیغام ہے کہ میرے حوصلے بلند ہیں، ان کا پیغام ہے کہ آپ نے حوصلہ نہیں ہارنا، پیغام آگے بڑھانے کیلیے ریجنل اور ضلعی سربراہان کا اجلاس طلب کیا ہے۔