مقبوضہ وادی میں بھارت کا ظلم دنیا کے سامنے بے نقاب ہورہا ہے، وزیرخارجہ

جنیوا: وزیرخارجہ شاہ محمود قریشی کا کہنا ہے کہ مقبوضہ وادی میں بھارت کا ظلم دنیا کے سامنے بے نقاب ہورہا ہے۔

تفصیلات کے مطابق وزیرخارجہ شاہ محمود قریشی نے اپنے ایک ویڈیو پیغام میں کہا کہ جنیوا میں انسانی حقوق کونسل کے اجلاس میں مقبوضہ کشمیر میں سیکیورٹی کے نام پر پابندیوں، بنیادی حقوق کی بحالی اور کرفیو اٹھائے جانے پر تبادلہ خیال کیا گیا ہے اور اجلاس میں مقبوضہ کشمیر میں مواصلاتی ذرائع کی معطلی ختم کرنے کا بھی مطالبہ کیا گیا۔

مقبوضہ کشمیرمیں37ویں روز بھی کرفیو

مقبوضہ کشمیر میں آج مسلسل 37ویں روز بھی کرفیو برقرار ہے اور مواصلات کا نظام مکمل پر معطل ہے، قابض انتظامیہ نے ٹیلی فون سروس بند کررکھی ہے جبکہ ذرائع ابلاغ پرسخت پابندیاں عائد ہیں۔

کشمیرمیڈیا سروس کے مطابق مواصلاتی نظام کی معطلی، مسلسل کرفیو اور سخت پابندیوں کے باعث لوگوں کو بچوں کے لیے دودھ، زندگی بچانے والی ادویات اور دیگر اشیائے ضروریہ کی شدید قلت کا سامنا ہے۔

یاد رہے کہ پانچ اگست کو مودی سرکار نے کشمیر کو خصوصی حیثیت دینے والے بھارتی آئین کے آرٹیکل 370 اے کو ختم کردیا تھا۔

راجیہ سبھا میں بل کے حق میں 125 جبکہ مخالفت میں 61 ووٹ آئے تھے، بھارت نے 6 اگست کو لوک سبھا سے بھی دونوں بل بھاری اکثریت کے ساتھ منظور کرالیے تھے۔